Банкі ў Беларусі ўводзяць чарговыя змены

Спажывецкія крэдыты, менш абмежаванняў у аперацыях з валютай і карткі для дзяцей.

Банкі ў Беларусі сталі больш актыўна вяртаць спажывецкае крэдытаванне. Праўда, стаўкі ў такіх пазыках усё яшчэ кусаюцца. Паступова мякчэюць абмежаванні на аперацыі з валютай. Некаторыя банкі да пачатку навучальнага года выпусцілі карты для дзяцей. «Люстэрка» сабрала асноўныя змены ў паслугах банкаў з пачатку жніўня.

«Белаграпрамбанк»

З 13 жніўня банк перастане працаваць з грашовым пераводам «Залатая Карона» ў мабільным дадатку і інтэрнэт-банкінгу, а з 15 жніўня і ў аддзяленнях банка.

З 3 жніўня «Белаграпрамбанк» вярнуў некаторыя спажывецкія крэдытныя праграмы. Адсоткавыя стаўкі высокія – 24% гадавых з прывязкай да стаўкі рэфінансавання. Ёсць кароткія крэдыты – да аднаго года, а таксама варыянт пазыкі да трох гадоў.

З 1 жніўня тут змякчылі абмежаванні ў картках і абмене валютаў. Унутры краіны можна абмяняць з выкарыстаннем рублёвых картаў не больш за 5 тысячаў даляраў. Выдаткоўныя наяўныя аперацыі з карткамі ў замежнай валюце – не больш за 1 тысячу даляраў на месяц у эквіваленце. У аперацыях за мяжой з карткамі «Белкарт» і Visa ў беларускіх або расейскіх рублях новыя абмежаванні ўстаноўленыя на ўзроўні 1 тысячы даляраў, наяўныя расходныя аперацыі ў еўра і далярах абмежавалі 5 тысячамі.

«Альфа банк»

У банкаматы «Альфа банк» вярнулі даляры, а таксама змякчылі абмежаванні для зняцця гатоўкі. У аддзяленнях банка можна замовіць зняцце са свайго рахунку да 50 тысячаў даляраў і да 20 тысячаў еўраў.

Тут жа з 4 жніўня змянілі стаўкі ва ўкладах. Напрыклад, адклікальны ўклад у рублях на адзін год прапануюць пад 11,8%. Безадклікальны на 13 месяцаў – пад 16%, а на 26 месяцаў – пад 15,5%. Уклад у далярах або еўрах на 7 месяцаў можна аформіць пад 4,5% гадавых, а на 25 месяцаў у амерыканскай валюце – пад 6%.

Крэдытныя карты банка сталі выдаваць на 5 гадоў. Раней у Нацбанку гаварылі пра праблемы з наяўнасцю спецыяльных чыпаў для пластыкавых картак.

«Белінвестбанк»

У гэтым банку прапануюць спажывецкія крэдыты на набыццё айчынных тавараў пад 19,9% гадавых.

Да пачатку навучальнага года «Белінвестбанк» выпусціў картку для дзяцей. У залежнасці ад узросту дзіцяці яе можна прывязаць да бацькоўскага рахунку або адкрыць асобны.

Малому бізнэсу і ІП прапануюць падаць заяўку на атрыманне дзяржаўнай субсідыі на выплату часткі адсоткаў у банкаўскіх крэдытах. Але гэтая прапанова дзейнічае не для ўсіх прадпрымальнікаў. Акрамя таго, ёсць абавязковая ўмова для дзяржпадтрымкі – стварэнне новых працоўных месцаў.

«Беларусбанк»

З 1 жніўня тут знізілі стаўкі ў некаторых крэдытах. Так, пазыку для фінансавання нерухомасці з дзяржпадтрымкай выдаюць пад 17,5% гадавых. Для тых, хто падпісаў дамову на будаўніцтва жылля з дзяржзабудоўнікам, прапануюць крэдыты пад 19,5% гадавых. Прапануюць крэдыт на набыццё Geely, стаўка ў ім таксама зніжаная. Пасля заканчэння грэйс-перыяду яна будзе 19,75%.

Памятаеце, у банка былі карткі для дзяцей з літарай Z, якія выклікалі нямала пытанняў, бо гэтую ж літару выкарыстоўвалі расейцы падчас ваеннай агрэсіі супраць Украіны? Насамрэч гэтыя карты банк выпусціў да пачатку мінулага навучальнага года паводле праграмы «Z-клас». Сёлета ў банку з'явілася новая клубная карта для дзяцей «Зебра».

Цяпер на сайце банка ў рамках клуба «Зебра» дэманструюць дакладна такую карту з касмічнай тэмай, якая была летась. Пластыку з літарай Z на фота няма. Але ў апісанні сказана, што кліенты могуць абраць адзін з двух дызайнаў карты.

«Белгазпрамбанк»

Банк знізіў стаўкі ў крэдытах для малога бізнэсу і фізічных асобаў. Тым не менш для насельніцтва стаўкі ўсё яшчэ застаюцца высокімі, напрыклад, узяць крэдыт на набыццё аўтамабіля можна пад 22%, а на будаўніцтва кватэры – пад 21%.

Для малога бізнэсу стаўкі ў новых крэдытах у беларускіх рублях стартуюць ад 14% гадавых, а ў далярах – ад 8%.

«Тэхнабанк»

З 5 жніўня аднавілі некаторыя спажывецкія крэдыты і знізілі адсоткі за іх карыстанне. Стаўкі ў іх, як і ў іншых банках, усё яшчэ высокія. Так, крэдыт тэрмінам на 13 месяцаў цяпер выдаюць пад 20,9% гадавых, а на 6 месяцаў – пад 19,9%.

З 4 жніўня ў банку аднавілі абслугоўванне чэкаў кампаніі Digital Tax Free. Зварот ПДВ можна аформіць за набыткі ў крамах Літвы.

З 10 жніўня прыпынілі прыём замежнай валюты ў банкаматах з функцыяй рэсайклінгу і ў інфакіёсках.

«Банк ЗГБ»

Для кліентаў банка запрацаваў сэрвіс Mir Pay для бескантактавай аплаты з дапамогай смартфонаў. Праз прыкладанне можна аплачваць пакупкі ў тэрміналах, якія прымаюць расейскую карту «Мір».

З 5 жніўня банк знізіў стаўкі ва ўкладах для фізічных асобаў. Гэта датычыцца адклікальных і безадклікальных дэпазітаў у беларускіх і расейскіх рублях.

Якія яшчэ змены ўвялі банкі з пачатку жніўня

У «Банку Дабрабыт» знізілі стаўкі на спажывецкія крэдыты да 25,99%. Выдаюць іх на тэрмін ад 6 месяцаў да 5 гадоў.

«Ашчад Банк» таксама аднавіў спажывецкае крэдытаванне. Для кліентаў банка стаўка складае 23,9%.

«БНБ-Банк» прапануе тэрміновыя безадклікальныя ўклады для нерэзідэнтаў краіны. Мінімальная сума для такіх дэпазітаў залежыць ад валюты: 1 тысяча рублёў, 1 тысяча даляраў, 1 тысяча еўраў і 50 расейскіх рублёў. З'явіўся таксама ўклад для беларусаў у расейскіх рублях тэрмінам на шэсць месяцаў пад 13 адсоткаў гадавых.