29 сакавiка 2024, Пятніца, 3:32
Падтрымайце
сайт
Сім сім,
Хартыя 97!
Рубрыкі

Кіраўнік брытанскай ваеннай выведкі назваў крытычныя праблемы арміі РФ

Кіраўнік брытанскай ваеннай выведкі назваў крытычныя праблемы арміі РФ

Агучаны прагноз на найбліжэйшыя месяцы вайны.

Генерал-лейтэнант Джым Хакенхал, кіраўнік ваеннай выведкі Вялікай Брытаніі, мяркуе, што вайна ва Украіне ўступіла ў зацяжную фазу, аднак канстатуе істотную камбінацыю праблемаў для расейскай арміі.

У рэдкім інтэрв'ю, якое Хакенхал даў ВВС, ён расказаў, што быў здзіўлены тым, з якой колькасцю праблемаў адначасова давялося сутыкнуцца арміі РФ пасля яе ўварвання ва Украіну.

Сярод іх кіраўнік брытанскай ваеннай выведкі адзначыў:

нізкаякаснае камандаванне, кіраванне і лагістычнае забеспячэнне расейскіх Узброеных сілаў, што шмат у чым абумовіла паразы арміі РФ ва Украіне;

негатыўны ўплыў палітычнага ўмяшання ў дзеянні расейскага войска – як на стратэгічным, так і на тактычным узроўнях;

адсутнасць даверу паміж палітычным і ваенным класам Расеі;

сіла супраціву Украіны і адзінства Захаду – абодва чыннікі перасягнулі ўсе чаканні.

У адказ на просьбу пракаментаваць далейшае развіццё падзей ва Украіне генерал-лейтэнант Джым Хакенхал заклікаў «з асцярожнасцю ставіцца да бінарнага ходу мыслення – што адзін з бакоў пераможа або пацерпіць паразу, – або меркаваць, што сітуацыя патавая».

Ён нагадаў, што РФ спрабуе ўсімі спосабамі задзейнічаць дадатковыя сілы пасля значных стратаў. Хакенхал таксама канстатаваў, што ўкраінская армія здолела значна націснуць на акупантаў у Херсонскай вобласці, чаму частку войскаў Расея вымушаная перадыслакаваць з Данбаса на поўдзень.

Аднак, мяркуе кіраўнік брытанскай ваеннай выведкі, у найбліжэйшыя месяцы наўрад ці варта чакаць вызначальнага пералому. Хакенхал адзначыў, што з разуменнем ставіцца да жадання Украіны вярнуць свае тэрыторыі, аднак не верыць, што які-небудзь з бакоў здолее правесці вызначальныя дзеянні да канца года – хоць контратак і контрнаступаў варта чакаць.

Таму, мяркуе брытанскі генерал-лейтэнант, рыхтавацца неабходна да доўгага канфлікту.

Каментуючы рызыкі выкарыстання Расеяй ядзернай зброі, Джым Хакенхал адзначыў, што мяркуе такі паварот падзей «малаверагодным» у найбліжэйшы час, але дадаў, што брытанская выведка сочыць за гэтым «вельмі, вельмі ўважліва». На думку генерал-лейтэнанта, верагоднасць выкарыстання ядзернай зброі «можа змяніцца, калі зменіцца дынаміка на полі бою».

Напісаць каментар

Таксама сачыце за акаўнтамі Charter97.org у сацыяльных сетках