Беларусы сутыкнуліся з дэфіцытам тлустай малочнай прадукцыі

Паліцы крам пусцеюць.

Беларусы паведамілі «Зеркалу», што ў крамах вельмі мала малочнай прадукцыі «высокай тлустасці»: малака тлустасцю ад 3,2% і смятаны тлустасцю вышэй за 20%. Адная з чытачак патэлефанавала па тлумачэнні ў МАРГ і Мінсельгасхарч Беларусі. Ва ўстановах мяркуюць, што «праблемы няма».

На мінулым тыдні беларусы заўважылі, што на прылаўках крамаў вельмі мала тлустага малака (ад 3,2% тлустасці) і смятаны (з тлустасцю ад 20%), а калі зайсці ўвечары, то гэтых прадуктаў можна не ўбачыць увогуле.

- Апошнім часам калі бачу малако тлустасцю 3,2%, то яно будзе ультрапастэрызаванае, з вялікім тэрмінам захоўвання. Але ў ім менш карысных рэчываў, чым у пастэрызаваным. Смятана часцей за ўсё стаіць з 15-20% тлушчу, вяршкоў наогул можа не быць. Шмат малочных вырабаў расейскай вытворчасці. Дзе нашае? Кажуць, што ўсё ідзе на экспарт, а часткай малака выкормліваюць цялят, - абураецца мянчанка Сафія (імя зменена на просьбу жанчыны).

Чытачка патэлефанавала ў Мінсельгасхарч і спытала, куды знікла «нармальныя малочныя прадукты»? Спачатку з ёй у дыскусію ўступіла супрацоўніца ведамства.

- Калі да нас паступаюць такія званкі, мы ўжо самі заходзім у краму: там ёсць усё. Магчыма, крама сама не разлічылася з заводам і таму вытворца яму не пастаўляе прадукцыю.

Далей у размову ўступіў намеснік міністра Вадзім Шагойка. Ён адзначыў, што «нашага малака ў краіне дастаткова, вырабляем з запасам».

Чыноўнік выказаў меркаванне, што праблема магла быць з-за «няспрытнасці прадаўцоў», іх пралікаў, можа быць яны прадукцыю «не выставілі або заленаваліся».

У сакавіку беларусцы таксама паведамілі, што магчыма, гэта праблема лакальнага ўзроўню, таму што прыярытэтная задача - гэта насыціць прадукцыяй унутраны рынак.