Казахстан дамовіўся экспартаваць нафту ў абыход Расеі

Агулам у абыход Расеі Казахстан мае намер экспартаваць крыху больш за 100 тысяч барэляў на дзень.

Улады Казахстана знайшлі новы маршрут для вывазу сваёй нафты на сусветны рынак пасля таго, як Расея ў чэрвені прыпыніла яе адгрузкі праз ключавы новарасейскі тэрмінал.

З верасня дзяржаўная кампанія «Казмунайгаз» пачне экспартныя пастаўкі праз Азербайджан, паведамляе Reuters (пераклад - Finanz) са спасылкай на крыніцы, знаёмыя з сітуацыяй.

З іх слоў, дамоўленасці з гандлёвай «дачкой» дзяржаўнай азербайджанскай карпарацыі SOCAR практычна дасягнутыя, а кантракт будзе падпісаны да канца жніўня. Яго першапачатковы аб'ём складзе 1,5 млн тон на год, або 30 тысяч барэляў на дзень, але будзе павялічаны да 5 млн тон з 2023 года.

Казахстанская нафта, найбуйнейшымі пакупнікамі якой з'яўляюцца еўрапейскія краіны, пацячэ на сусветны рынак праз трубаправод, які вядзе ў турэцкі порт Джайхан, гавораць крыніцы Reuters.

Са студзеня да гэтых паставак дабавіцца экспарт праз порт Супса ў Грузіі. Агулам у абыход Расеі Казахстан мае намер экспартаваць крыху больш за 100 тысяч барэляў за дзень, або 8% свайго нафтавага экспарту.

Казахстан займае 11-е месца ў свеце ў аб'ёме здабычы нафты - 1,7 млн барэляў за дзень. На экспарт сыходзіць 89% гэтага аб'ёму, прычым большая частка - па трубе, якая вядзе ў Новарасейск.