У Херсонскую вобласць завезлі «заградатрады» кадыраўцаў

Расейцы дэмаралізаваныя і чакаюць ратацыі.

Акупанты на правабярэжнай Херсонскай вобласці маюць праблемы з пастаўкай снарадаў у артылерыйскія ўстаноўкі.

Пра гэта паведаміў у эфіры «Единых новостей» дэпутат Херсонскай аблрады Сяргей Хлань.

Паводле ягоных словаў, 15 жніўня мясцовыя паведамлялі пра выбухі. Ва УСУ пацвердзілі знішчэнне склада з боепрыпасамі ў Берыслаўскім раёне. Напады расейцаў адбітыя, на фронце яны сталі больш выкарыстоўваць авіяцыю, таму што ў іх ёсць лагістычныя праблемы з пастаўкай снарадаў да артылерыі. Яны канцэнтруюць боепрыпасы на левым беразе, але ў іх праблемы з забеспячэннем правым праз пашкоджанне мастоў. Расейскія войскі засяроджваюць сілы на тым, каб утрымацца на занятых пазіцыях.

Асабісты склад дэмаралізаваны. Яшчэ калі было ўпершыню дакладна знішчэнне казармы расейцаў і кіраўніцтва расгвардыі ў Херсоне, то расейскія камандзіры пачалі эвакуяваць свае сем'і з Херсона, якія жылі ў мясцовых гатэлях, іх адпраўлялі ўглыб акупаванай тэрыторыі.

Спачатку яны беглі ў Алешкі, але пасля выбухаў у Алешках і Новай Кахоўцы цяпер перамяшчаюцца бліжэй да Крыма. Пазней быў знішчаны камандны пункт у Скадоўскім раёне, і сярод расейскіх камандзіраў пачалася паніка – кіроўны склад цяпер шукае сабе бяспечнае месца.

Усё гэта бачыць шараговы склад, таму дэмаралізацыя ў іх шалёная, яны чакаюць ратацыі, каб уцячы ў Расею і не вяртацца на фронт. У той самы час кіроўны склад нічога іншага не прыдумаў, як увёў сістэму «палітрукоў», якія праводзяць сумоўі і раздаюць салдатам раздрукоўкі, што Украіну стварылі бальшавікі і цяпер Расея стрымлівае фашызм і «бандэраўшчыну». Аднак гэта мала дапамагае пасля выбухаў складоў і стратаў на фронце.

Таму на Херсоншчыну перакінулі кадыраўцаў для фармавання «заградатрадаў», бо ўзровень дэзерцірства сярод расейцаў вельмі высокі.