«Каліноўцы» адказваюць на пытанні патэнцыйных навабранцаў

Як стаць байцом палка?

Кожны месяц у тэлеграм-канале палка Кастуся Каліноўскага з'яўляюцца відэа-паведамленні, у якіх каліноўцы адказваюць на пытанні беларусаў і грамадзян іншых краін, якія мараць абараняць Украіну падчас вайны. «Еўрарадыё» сабрала іх у адзіны тэкст, каб кожны патэнцыйны навабранец разумеў, чаму яго заяўка разглядаецца так доўга, што чакае на фронце і як падтрымаць блізкіх, калі заяўку ўсё ж ухваляць.

«Пастанавіў стаць байцом палка, але пры гэтым разумею, што на маім утрыманні сям'я. Як яны будуць існаваць без майго заробку?»

Падкрэслім: усе без выключэння байцы палка Кастуся Каліноўскага падпісваюць кантракт з Узброенымі сіламі Украіны. Гэта гарантуе ім штомесячны заробак. Існуюць бяспечныя спосабы падтрымаць сям'ю, якая засталася ў Беларусі. Майце на ўвазе, што кантракт не падпісваецца ў першы дзень прыбыцця навабранца ў полк. Спачатку навабранец залічваецца ў навучальную роту, дзе цягам месяца праходзіць курс неабходнай падрыхтоўкі. Увесь гэты час навабранец знаходзіцца на поўным забеспячэнні, але заробак пачынае налічвацца пасля падпісання кантракта.

Што рабіць, калі пасля звароту ў чат-бот, анкетавання і адпраўкі дакументаў працэс верыфікацыі зацягваецца? Дзесяць дзён прайшлі, але адказу пакуль няма».

Працэс верыфікацыі кандыдатаў у полк Кастуся Каліноўскага ў кожным канкрэтным выпадку праходзіць па-рознаму. У асобных выпадках ён патрабуе большай колькасці часу. Дзесяць дзён - гэта агульная лічба. Звяртаем увагу, што час разгляду можа зацягвацца праз вялікую колькасць заявак, але мы робім усё магчымае, каб паскорыць гэтую працэдуру. Калі з вамі доўга не звязваюцца, растлумачыць сітуацыю вы можаце, нагадаўшы аб сабе ў чат-боце. Не хвалюйцеся: бяспека кожнага кандыдата для нас у прыярытэце.

«Навабранцы, якія паспяхова прайшлі верыфікацыю і рыхтуюцца да прыбыцця ў полк, пытаюцца: ці варта самастойна набыць для сябе нешта з экіпіроўкі?»

Экіпіроўку добраахвотнікаў цалкам бярэ на сябе полк. Набываць нешта самастойна не трэба. Калі вы ўсё ж вызначылі набыць сабе нешта з вайсковай амуніцыі, найлепшым выбарам, на наш погляд, будзе якасны тактычны абутак. Яшчэ адна пара берцаў ніколі не была лішняй для вайскоўца.

«Ці можа грамадзянін Украіны ці замежнік (не беларус) стаць байцом палка Каліноўскага?»

Калі грамадзянін Украіны ці іншы замежнік з'яўляецца спецыялістам выключна высокага ўзроўню, ён мае ўсе шанцы апынуцца ў шэрагах палка Каліноўскага. Для гэтага трэба напісаць у наш чат-бот і абавязкова паведаміць аб наяўнасці спецыяльнай падрыхтоўкі, аб узроўні вайсковай падрыхтоўкі, аб сваім баявым досведзе.

Беларусы з украінскімі пашпартамі таксама могуць стаць байцамі палка. Пасля падачы заяўкі ў чат-бот і ўзгаднення вашай кандыдатуры мы зробім усё, што ад нас залежыць, каб вы як мага хутчэй сталі ў нашы шэрагі.

Для іншых замежнікаў, якія мараць абараняць Украіну ад расейскай агрэсіі, паведамляем: у лютым 2022 года ўрад на просьбу прэзідэнта Зяленскага стварыў добраахвотніцкае вайсковае падраздзяленне - Інтэрнацыянальны легіён тэрытарыяльнай абароны Украіны. Гэта вайсковае фармаванне для добраахвотнікаў-іншаземцаў. Каб уступіць у шэрагі легіёна, неабходна звярнуцца ў пасольства Украіны ў сваёй дзяржаве, дзе вам прапануюць алгарытм далейшых дзеянняў.

«Калі са мной нешта здарыцца падчас баявых дзеянняў, як пра гэта даведаюцца мае блізкія?»

Кожны баец палка Каліноўскага пасля падпісання кантракта становіцца вайскоўцам Узброеных сіл Украіны. Вайскоўцы ў абавязковым парадку пакідаюць кантакты тых людзей, каму яны ўважаюць за неабходнае паведаміць інфармацыю аб іх. Гэта могуць быць як сваякі, так і іншыя асобы, якіх указвае вайсковец.

Даслаць свае пытанні ў прэс-службу палка Кастуся Каліноўскага можна праз тэлеграм-канал @PressBelWar і чат-бот @BelarusAndUkraineBot.