Беларускіх настаўнікаў таксама абавяжуць насіць «школьную форму»?

Такія прапановы ўжо абмяркоўваюць на дзяржаўным ТВ.

Адзіную уніфікаваную форму для настаўнікаў беларускіх школ абмеркавалі ў эфіры дзяржаўнага ТВ, піша «Комсомолка».

Журналістка тэлеперадачы заўважыла, што ў той час, калі гавораць аб дзелавым стылі для дзяцей у школах, можна прапанаваць і ўніфікаваную форму для настаўнікаў. Прывяла ў прыклад савецкіх настаўнікаў, з яе слоў - «яркіх прадстаўнікоў дзелавога і вытрыманага стылю».

- Калі ўжо вучням загадана хадзіць у форме, дык і настаўнікам нічога не перашкаджае прыйсці да гэтага адзінага стылю, - заўважыла карэспандэнтка.

Аднак Валянціна Сяліцкая, настаўніца пачатковых класаў адной са школ Менска з гэтым не пагадзілася. Маўляў, калі для настаўнікаў увядуць адзіную форму, то «настаўнікаў тады ў школе не застанецца». Педагог мяркуе, што цяжка загнаць у адзіныя рамкі сучасных настаўнікаў, асабліва маладых адмыслоўцаў.