6 кастрычнiка 2022, Чацвер, 12:42
Сім сім, Хартыя 97!
Рубрыкі

Новы скандал у войску РФ: дэсантнікі ўзбунтаваліся

35
Новы скандал у войску РФ: дэсантнікі ўзбунтаваліся

«Баявую эліту» Расеі падманулі з грашыма і адправілі паміраць ва Украіну.

Расейская 31-я асобная дэсантна-штурмавая брыгада ПДВ пасля пачатку поўнамаштабнага ўварвання ў нашу краіну панесла вялікія страты. «Знакамітыя» ульянаўскія дэсантнікі былі не такімі ўжо і несмяротнымі, як іх пазіцыянавалі ў РФ. Больш за тое, зараз «баявая эліта» ў паніцы стала разрываць кантракты і адмаўляцца ваяваць ва Украіне.

З чым звязаны гэты «бунт» - чытайце ў матэрыяле «Обозревателя».

Здаюць свае, а начальства пагражае турмой

Пасля масавай адмовы буратаў ваяваць ва Украіне ў РФ выліўся новы скандал - на гэты раз з 31-й дэсантна-штурмавой брыгадай Паветрана-дэсантных войскаў (в/ч 73612, месца дыслакацыі - Ульянаўск). «Баявая эліта» пасля вялікіх страт на Данбасе пачала масава падаваць рапарты на звальненне.

«Камандаванне адмоўнікаў угаворвае, запалохвае, называе здраднікамі Радзімы, кажа ім: калі напішуць рапарт - гэта, натуральна, крымінальная справа. Але вайскоўцы мяркуюць, што яны - звычайныя наёмныя працаўнікі. Вайна не абвешчана, ідзе «спецаперацыя». Чаму яны не могуць звольніцца? Жонкі шукаюць спосабы, як вывезці сваіх мужоў», – падзяліўся суразмоўца расейскага Telegram-канала «Можем объяснить».

З інфармацыі крыніц «МО», страты ўльянаўскіх дэсантнікаў за апошні час ужо склалі блізу 150 чалавек, больш за 400 атрымалі раны. Большасць з іх «пацярпелі» падчас баёў у Луганскай вобласці.

Больш за тое, нягледзячы на тое, што расейскае міністэрства абароны абяцала кантрактнікам за «працу» на тэрыторыі Украіны ад 220 тысяч рублёў на месяц, у рэальнасці ўсё было не так. Максімальныя выплаты шарагоўцам і сяржантам складаюць 100-150 тысяч рублёў. Гэта таксама выклікала хвалю абурэнняў сярод акупантаў, якія разлічвалі паправіць сваё матэрыяльнае становішча.

Скандал зараз спрабуюць замяць на ўсіх узроўнях, аднак атрымліваецца дрэнна.

Са звестак крыніцы OBOZREVATEL у ваеннай выведцы, расейскія дэсантнікі ўжо разумеюць, што іх чакае ва Украіне. «Тыя, каму ўдалося ўсё ж выбрацца жывымі, робяць усё магчымае, каб больш не патрапіць у нашу краіну. Некаторыя здзяйсняюць «самастрэлы» - спецыяльна раняць сябе, каб адправіцца дадому. Іншыя спрабуюць усялякім спосабам разарваць кантракт, таму што жыццё даражэйшае», – распавёў наш суразмоўца.

Аднак расейскія дэсантнікі ўжо баяцца не толькі ўкраінскіх ваяроў, але і сваіх камандзіраў. Раней Галоўная ўправа выведкі МАУ выклала аўдыёперахоп цікавай размовы акупанта са сваёй дзяўчынай.

Вайсковец паскардзіўся на «зліў інфармацыі», а дзяўчына агучыла цікавы факт: палкоўнік Мацькоўскі з 31-й брыгады здаў месцазнаходжанне сваіх жа байцоў замежнай выведцы. З ейных звестак, якія пасля пацвердзіў дзяўчыне знаёмы супрацоўнік ФСБ, з Украіны (мяркуючы з усяго, мёртвымі) «прывезлі 76 чалавек», а ў палкоўніка на рахунках выявілі 17 млн.

Каласальныя страты ПДВ РФ ва Украіне

На загад зверху 31-я дэсантна-штурмавая брыгада даволі старанна хавала страты: ну як жа, знакамітыя ўльянаўскія дэсантнікі - і так ганебна загінулі. Тым не менш, праз нейкі час звесткі сталі патроху прасочвацца ў сеціва.

Напрыклад, 3 жніўня стала вядома аб гібелі камандзіра аддзялення групы спецыяльнага прызначэння 31-й АДШБр Аляксандра Ціханава. OSINT-даследчык Іраклі Камахідзэ звярнуў увагу на фота з Ульянаўскай вобласці, на якім быў банэр з «двухсотым» акупантам.

З гэтага здымку і ўдалося ідэнтыфікаваць дэсантніка - высветлілася, што ён быў ліквідаваны ва Украіне яшчэ 30 красавіка 2022 года.

Камандзір аддзялення групы спецыяльнага прызначэння 31-й АДШБр Аляксандр Ціханаў ліквідаваны ва Украіне.

А вось з загінулым ва Украіне пляменнікам намесніка міністра абароны РФ сітуацыя іншая. Аб гэтай «страце» трубілі ўсе расейскія СМІ, тым больш што капітану Адаму Хамхоеву пасмяротна прысвоілі вышэйшую ўзнагароду краіны-акупанта - «Героя Расеі».

Тым часам страты «слаўнай» брыгады ўвесь час растуць, а на могілках ва Ульянаўску з'яўляюцца шэрагі свежых магіл.

А 16 ліпеня быў звольнены з пасады камандзіра ВДВ РФ генерал-палкоўнік Андрэй Сердзюкоў. Змена камандзіра падчас вайны - вялікая рэдкасць, яна фактычна стала своеасаблівым прызнаннем няўдалага ўдзелу расейскіх элітных падраздзяленняў у «спецаперацыі» на тэрыторыі Украіны.

На вялікія страты расейскіх ПДВ (мінімум 20% «груза 200» усіх акупантаў) звярнулі ўвагу і ў брытанскай выведцы. Там паведамілі, што гэта абумоўлена задзейнічаннем у непрыдатных для іх спецыялізацыі аперацыях. Ёсць праблема ў расейцаў і з забеспячэннем жаўнераў сучаснымі сродкамі меддапамогі.

Што і казаць, калі расейцы, якія падтрымліваюць акупантаў, у сацсетках збіралі сродкі нават на турнікеты і сродкі для спынення крывацёку для «баявой эліты».

Дзе «засвяціліся» ульянаўскія дэсантнікі

31-я АДШБр належыць да Паветрана-дэсантных войскаў. Гэта цалкам самастойны род войскаў са сваім спецназам, БПЛА, РЭБ, артылерыяй і танкавай падтрымкай.

Дэсантна-штурмавы батальён гэтай брыгады нават пампезна ўнеслі ў «кнігу рэкордаў» узброеных сіл РФ «за першае ў найноўшай гісторыі масавае беспарашутнае дэсантаванне». Гэта адбылося падчас стратэгічных камандна-штабных вучэнняў «Цэнтр-2019»: тады за 14 хвілін з бартоў гелікаптэраў Мі-8 былі высаджаныя больш за 200 вайскоўцаў.

Памылкова думаць, быццам ульянаўскія дэсантнікі з'явіліся ва Украіне толькі пасля пачатку поўнамаштабнага ўварвання ў 2022 году. Яшчэ ў самым пачатку агрэсіі Расеі іх заўважылі падчас акупацыі АРК.

Менавіта расейскія дэсантнікі 31-й АДШБр у форме ўкраінскага падраздзялення «Беркут» 26 лютага 2014 года захапілі будынак крымскага парламента.

Таксама вядома, што акупанты ваявалі ў Луганскай і Данецкай абласцях, пад Ілавайскам.

А ўжо ў 2022 годзе вайскоўцы 31-й брыгады панеслі вялікія страты ў Данецкай, Луганскай і Кіеўскай абласцях.

Так, іх дэсант у ліку іншых падраздзяленняў высадзіўся на аэрадроме «Антонаў» у Гастомелі і пасля быў знішчаны ўкраінскімі абаронцамі. Кожны расеец абавязкова адкажа за ваенныя злачынствы ва Украіне.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».