Украінскае войска прарвала фронт і абыходзіць войскі РФ пад Ліманам з поўначы
8- 23.09.2022, 8:12
- 47,066
З'явіліся карты новай лініі баёў.
Згодна з інфармацыяй падраздзяленні ўкраінскага войска абыходзяць з поўначы Ліманскі раён абароны войскаў РФ.
Пра гэта сведчаць карты баёў на ўсходнім адцінку фронту, паведамляе dialog.ua.
Акрамя таго, расейскія вайсковыя прапагандысты з пазнакай «тэрмінова» паведамляюць аб прарыве фронту падраздзяленнямі УСУ ў раёне населеных пунктаў Рэдкадуб і Карпаўка.
Так, пра гэта ў сваім тэлеграм-канале паведаміла расейская «вайсковая карэспандэнтка» Ганна Даўгарава. Паводле ейнай інфармацыі, падраздзяленні УСУ прарвалі лінію фронту і абыходзяць групоўку расейскага войска і яе лінію абароны ў Лімане з поўначы. Даўгарава спасылаецца на інфармацыю расейскіх вайскоўцаў з батальёна «Рускі Легіён» (БАРС-13).
«Мы Дробышава (заходней Лімана) утрымліваем. Гэта нам у тыл зайшлі, абыходзяць з поўначы Ліманскую групоўку», - паведаміў камандзір расейскага батальёна Сяргей Фомчанкаў («Фаміч»).
У сваю чаргу, тэрарыст Ігар Стралкоў (Гіркін) у сваім тэлеграм-канале паведаміў аб прадаўжэнні бязлітасных баёў пад Ліманам. З ягоных звестак, украінскае войска заходзіць у тыл групоўкі расейскіх акупантаў.
Нагадаем, на мінулым тыдні стала вядома аб вызваленні сяла Яцкаўка, размешчанага на паўночны захад ад Лімана. Паведамлялася, што ўкраінскае войска «адразае» Ліман для контрнаступу на Севераданецк і Лісічанск.
Акрамя таго, паведамлялася аб дэакупацыі населенага пункта Шчурава, які размяшчаецца ўсяго за 12 км ад Лімана. У Сеціве было апублікавана відэа, як украінскія вайскоўцы ўстанаўліваюць дзяржаўны сцяг над гэтым сялом.