На Гомельшчыне радыяцыя ў прадуктах у разы перавышае норму

Больш за ўсё радыёнуклідаў выяўлена ў свежых і перапрацаваных грыбах.

Санітарны нагляд Гомельскай вобласці даў справаздачу аб даследаваннях прадуктаў на радыёнукліды, праведзеных у жніўні, піша zerkalo.io. Часцей за ўсё «зашкальвалі» прынесеныя грамадзянамі грыбы і чарніцы - напрыклад, у грыбах з Добрушскага раёна ўзровень цэзію-137 перавысіў норму ў 47 разоў, у чарніцах з-пад Веткі - у 8 разоў, паведамілі ў абласным цэнтры гігіены, эпідэміялогіі і грамадскага здароўя.

У жніўні на Гомельшчыне правялі 658 проб харчавання і вады на ўтрыманне цэзію-137 і стронцыю-90. У прадстаўленых дзяржсектарам узорах перавышэнне радыёнуклідаў не выяўлена, а вось у прынесеных грамадзянамі прадуктах яно выявілася ў 51 выпадку (13,1 адсотка).

Больш за ўсё (27 проб) - у свежых і перапрацаваных грыбах, крыху менш (22 пробы) - у свежых чарніцах і кансерваваных прадуктах з яе. Перавышаны паказчыкі цэзію-137 таксама ў малацэ і мяце.

Небяспечны ўзровень радыенуклідаў у прадуктах зарэгістравалі ў 10 раёнах: Буда-Кашалёўскім, Веткаўскім, Добрушскім, Ельскім, Кармянскім, Лельчыцкім, Нараўлянскім, Рагачоўскім, Хойніцкім, Чачэрскім. У даследаваных грыбах з Добрушскага раёна ён апынуўся вышэйшым за дапушчальны ў 47 разоў (17 490 Бк/кг пры нарматыве 370 Бк/кг), а ў чарніцах з Веткаўскага раёна - у 8 разоў (1596 Бк/кг пры нарматыве 185 Бк/ кг).

У цэнтры заклікалі правяраць грыбы на ўтрыманне радыенуклідаў перад ужываннем у ежу і нагадалі, што ў тэрытарыяльных цэнтрах гігіены і эпідэміялогіі можна зрабіць гэта бясплатна.

Аб'ём пробы, неабходнай для даследавання, павінен складаць не менш за 0,5 л (для сухіх грыбоў - не менш за 100 г). Аб выніках праверкі паведамяць у той жа дзень.