Бязмытны ўвоз тавараў для фізічных асоб сумай 1 000 еўраў працягнулі на паўгода

«Улады» баяцца дэфіцыту тавараў першай неабходнасці.

«Савет» Еўразійскай эканамічнай камісіі 23 верасня прадоўжыла на паўгода дзеянне бязмытнага парога пры ўвозе тавараў для фізічных асоб сумай 1000 еўраў. Пра гэта паведаміла на брыфінгу прадстаўнік ЕЭК Ія Малкіна, піша zerkalo.io.

- Прадоўжанае дзеянне парога бязмытнага ўвозу тавараў для фізічных асоб на 1 000 еўраў да 1 красавіка 2023 года, - распавяла Малкіна.

Яна нагадала, што вясной 2022 года «Савет» ЕЭК падвысіў парог бязмытнага ўвозу да 1000 еўраў для тавараў, якія перавозяцца перавозчыкам або ў паштовых адпраўленнях, а таксама ўвезенага багажом усімі відамі транспарту, акрамя паветранага, або ў пешым парадку.

- Такі парог быў усталяваны на часовай аснове да 1 кастрычніка гэтага года. Падаўжэнне меры дазволіць падтрымаць грамадзян «ва ўмовах санкцыйнага ціску» і пазбегнуць дэфіцыту тавараў першай неабходнасці і тавараў крытычнага імпарту, - падкрэсліла прадстаўніца ЕЭК.