Украінскі генерал: УСУ могуць выклікаць «каскаднае падзенне» войска РФ

Пасля прарыву першай лініі абароны наступныя лініі будуць здавацца без бою.

Украінскія Сілы абароны могуць выклікаць «каскаднае падзенне» войска ворага, калі, прарваўшы першую лінію абароны, наступныя лініі будуць здавацца без бою. Галоўная ўмова для гэтага - магутныя пастаўкі заходніх узбраенняў.

Пра гэта ў эксклюзіўным інтэрв'ю obozrevatel.com расказаў экс-намеснік начальніка Генеральнага штаба Узброеных сіл Украіны генерал-лейтэнант Ігар Раманенка.

- Кіраўнік дыпламатыі Еўразвязу Жазэп Барэль заявіў, што паспяховы контрнаступ украінскага войска на Харкаўшчыне дае надзею на заканчэнне вайны. Вы згодны з такой ацэнкай?

- Заканчэнне вайны - не, але магчымая перспектыва прыпынення баявых дзеянняў.

У чым адрозненне? Заканчэнне вайны для Украіны можа мець месца тады, калі зменіцца рэжым у Расеі. Гэта не значыць, што замест Пуціна проста прыйдуць прапуцінцы. Гэта значыць, што павінны адбыцца прынцыповыя перамены - да ўлады павінен прыйсці дэмакратычны ўрад.

Заканчэнне баявых дзеянняў магчымае ў тым выпадку, калі на фронце будуць сур'ёзныя дасягненні стратэгічнага ўзроўню. Тое, што адбылося ў Харкаўскай вобласці, - гэта дасягненні аператыўнага ўзроўню. Вельмі важныя, неабходныя. Наша войска мае перспектывы ў кірунку Данецкай аперацыйнай зоны - Ліман і Лісічанск Луганскай вобласці.

Але каб дасягнуць стратэгічнага ўзроўню, хаўруснікам неабходна паставіць УСУ сучасныя эфектыўныя ўзбраенні і тэхніку. Гэта дазволіць рэалізаваць стратэгічную задачу, якую сфармуляваў міністр абароны ЗША Осцін яшчэ на першым «Рамштайне» - панізіць патэнцыял РФ да ўзроўню, калі яна не зможа ваяваць з кім-небудзь, у першую чаргу з суседзямі.

Нібыта ёсць пакуль яшчэ неафіцыйныя пастановы амерыканцаў наконт таго, што ўсё ж да гэтай мэты неабходна ісці. Магчыма, ва ўмовах гібрыднай вайны адкрыта казаць пра гэта не трэба, але Украіну трэба забяспечваць узбраеннем.

У Расеі пакуль ёсць перавага ў рулевай артылерыі, у сістэмах залпавага агню. І гэты патэнцыял трэба выраўноўваць. Зыходзячы з таго, як гэта адбываецца зараз, указанняў на тое, што такое выраўноўванне адбудзецца хутка, не.

Але гэта можа адбыцца праз каскаднае падзенне. Нам неабходна дасягнуць поспехаў у такога роду вайсковай аперацыі, напрыклад, на Херсонскім або на Данецка-Луганскім кірунку.

- Што такое каскаднае падзенне?

- Гэты татальны ўплыў на супраціўніка, калі поспех дасягаецца на нейкім участку, напрыклад, прарываецца першая лінія абароны. Пад уплывам не столькі нашых ударных сіл, але дзякуючы маральна-псіхалагічнаму і палітычнаму ўздзеянню, другая, трэцяя і наступныя лініі абароны ўжо не супраціўляюцца.

Такі вайсковы прарыў можа прывесці да форс-мажорных абставін у ваенна-палітычным кіраўніцтве Расеі.

Але каб ажыццявіць гэта выключна ваенным шляхам, нам патрэбна сучаснага ўзбраення ў чатыры разы больш, чым тое, якое нам паставілі супольнікі за паўгода вайны.

- Такім чынам, на вашую думку, заканчэнне вайны пры цяперашнім рэжыме ў Расеі немагчымае, але магчымае прыпыненне вайсковых дзеянняў. На якім пункце?

- Калі адбудуцца адпаведныя дзеянні на фронце, калі будзе яшчэ адзін поспех аператыўнага ўзроўню, напрыклад, на Херсонскім кірунку, гэта прывядзе да змен у вайскова-палітычным кіраўніцтве Расеі. Але гэта будзе прыпыненне баявых дзеянняў. Магчыма, яны пагодзяцца на тое, каб поўнасцю вызваліць нашу тэрыторыю.

- Уключаючы Крым?

- Вядома, наша кіраўніцтва паставіла мэту вызваліць тэрыторыю Украіны і выйсці на межы 1991 года. А гэта значыць, не толькі Крым, але і Данбас.

- Гэта рэальная перспектыва?

- За яе цяпер змагаецца кіраўніцтва краіны на чале з прэзідэнтам. Калі раней гаворка ішла аб тым, каб вярнуцца да межаў на 23 лютага, то зараз, пасля столькіх ахвяр і страт, Украіна перахапіла не толькі вайсковую, але і палітычную ініцыятыву. Таму падыход ужо іншы - вяртанне да межаў 1991 года.

- Удакладніце, калі ласка. Вы думаеце, што магчымы поўны сыход расейскага войска з тэрыторыі Украіны, але гэта не будзе азначаць заканчэнне вайны?

- Гэта можа прывесці да прыпынення баявых дзеянняў і пачатку перамоў аб існаванні дзяржавы, аб гарантаванні бяспекі з мэтай не дапусціць паўтарэння таго, што адбылося 24 лютага.

Але гэта не заканчэнне вайны. Заканчэнне вайны - гэта вяртанне ўсіх акупаваных тэрыторый і змена рэжыму ў Расеі, каб з імі можна было ўкладаць нейкія пагадненні з тым, каб бяспека Украіны не была зноў парушаная.

- Паводле ацэнак Інстытута вывучэння вайны, ужо найбліжэйшыя тыдні ўкраінскія Сілы абароны могуць вярнуць ледзь не ўсю заходнюю частку Херсонскай вобласці, калі працягнуць контрнаступ і блакіраванне лагістыкі РФ. Вы згодны?

- Для таго, каб гэта адбылося, трэба ў значнай ступені панізіць вайсковы патэнцыял правабярэжнай групоўкі супраціўніка на Херсонскім кірунку. Пакуль гэтага не дасягнута. Мы шануем сваіх салдат, кідаць іх на шмат эшаланаваную абарону немэтазгодна.

Нам трэба займацца Херсонскім кірункам, а тут біць іх артылерыяй, авіяцыяй, паніжаць іх патэнцыял. Затым ацаніць сітуацыю, нашыя і іх магчымасці. Думаю, Генштаб здабудзе гэты час для таго, каб нанесці канчатковы ўдар па Херсонскай групоўцы супраціўніка.