Кіраўнік РПЦ Кірыл заявіў, што смерць на вайне супраць Украіны «змывае ўсе грахі»

Патрыярх дабраславіў вайскоўцаў РФ на забойства ўкраінцаў.

Патрыярх РПЦ Кірыл на нядзельнай пропаведзі заявіў, што смерць на вайне з Украінай «змывае ўсе грахі» і фактычна параўнаў мабілізаваных расейцаў з Езусам Хрыстом.

Адпаведнае відэа апублікавала ў Telegram расейскае онлайн-выданне SOTA.

«Царква ўсведамляе, што калі нехта, рухомы пачуццём абавязку, неабходнасцю выканаць прысягу, застаецца верным свайму пакліканню і гіне пры выкананні вайсковаага абавязку, то ён, несумненна, чыніць дзеянне, раўнасільнае ахвяры. Ён сябе прыносіць у ахвяру за іншых. І таму верым, што гэтая ахвяра змывае ўсе грахі, якія чалавек учыніў», - сказаў Кірыл.

Пасля пачатку поўнамаштабнай вайны Расеі супраць Украіны, кіраўнік РПЦ патрыярх Кірыл фактычна падтрымаў агрэсію Расеі і дабраславіў вайскоўцаў краіны-агрэсара на забойства ўкраінцаў. У красавіку падчас службы ў храме ўзброеных сіл РФ Кірыл расхвальваў расейскіх салдат і ставіў пад сумнеў незалежнасць Украіны.