Колькі будзе каштаваць беларусам адпачынак на моры гэтай зімой

Дабрацца ў Дамініканскую Рэспубліку ці Мексіку прасцей і танней за ўсё з Варшавы.

Нягледзячы на заканчэнне летняга турыстычнага сезону, шанцы пагрэць бакі на марскіх пляжах у беларусаў ёсць і ў халодны час года. Выбар вельмі абмежаваны, кошты тураў даўно нельга назваць дэмакратычнымі, але калі вельмі хочацца, дык можна, піша Onlíner.

Хіт сезону – ААЭ, класіка – Егіпет

Калі гаворка пра адпачынак з вылетам з Беларусі, то варыянты тры: Егіпет, ААЭ і турэцкая Анталля, – але да пачатку зімы апошні адваліцца праз клімат.

– За хіт сезону можна ўважаць ААЭ, куды з канца кастрычніка ўжо штодня будзе лятаць «Белавія», таксама плануецца выкананне штодзённых рэйсаў авіякампаніяй Fly Dubai. Эміраты прапануюць нашым турыстам выбар размяшчэння на любы бюджэт, выдатныя пляжы і вялікую разнастайнасць забаваў, славутасцяў і актыўнасцяў, – расказаў Onlíner дырэктар кампаніі «Ваяжтур» Яўген Сазыкін.

Але Егіпет – традыцыйна самы папулярны кірунак восеньска-зімовага сезону. У летні час праз неабходнасць аблёту патрабавалася дадатковая пасадка ў Анталлі, цяпер жа рэйсы паступова пераводзяцца на новы маршрут – хутчэйшы і без тэхнічнай пасадкі, дзякуючы чаму павінны ўпасці і кошты квіткоў.

– Галоўнай перавагай Егіпта застаюцца больш даступныя (у параўнанні з Эміратамі) кошты размяшчэння і сістэма харчавання «ўсё ўключана», так упадабаная беларускімі турыстамі, – адзначае Яўген Сазыкін.

Прыблізны кошт на дваіх за 10 начэй у Егіпце – 5800 рублёў у чатырохзоркавым гатэлі.

Колькі каштуе пуцёўка ў ААЭ і што там рабіць

Адзін з кірункаў, якія набіраюць папулярнасць, – Эміраты. Прынята меркаваць, што гэты варыянт адпачынку даступны толькі заможным людзям. Ці так гэта?

– Выбар варыянтаў для адпачынку ў ААЭ вялікі – яны могуць падысці розным групам турыстаў. Напрыклад, вандроўнікі, якія хочуць зэканоміць, выбіраюць гарадскія гатэлі ў Дубаі са сняданкам або паўпансіёнам, – кажа спецыяліст.

Кошт такога адпачынку стартуе ад 2300 рублёў на чалавека за тыдзень. Пры гэтым дабірацца на пляж, да славутасцяў і ў гандлёвыя цэнтры трэба будзе на транспарце.

Калі для турыстаў важнейшы пляж, то лепш выбіраць гатэлі ў такіх эміратах, як Рас-аль-Хайма, Аджман, Шарджа і Фуджайра. Тут тыдзень адпачынку ў гатэлі, размешчаным на беразе мора, са сняданкам стартуе ад 2600 рублёў за чалавека.

Ну, і прадказальна, што самыя шыкоўныя пляжныя гатэлі размешчаны ў Дубаі – тут кошты адчувальна вышэйшыя.

– Напрыклад, сёлета адчыніўся першы гатэль толькі для дарослых (16+), які прапануе не толькі элегантныя нумары з відамі на заліў і самае высокае ў свеце кола агляду Айн-Дубай, але таксама дыджэйскія сэты ля панарамнага інфініці-басейна і яркія гастранамічныя ўражанні ў найлепшых рэстаранах. Тыдзень у такім гатэлі абыдзецца ад 8000 рублёў на аднаго госця, – расказвае дырэктар кампаніі «Ваяжтур».

Чым характэрныя Эміраты, акрамя пляжаў і пустыні? Мноства молаў і аўтлетаў, у тым ліку з маштабнымі распродажамі, тэматычныя паркі атракцыёнаў, аквапаркі, акварыумы, батанічныя і заалагічныя сады. Сам Дубай – гэта горад-экспанат з музеем будучыні, начным жыццём з барамі і рэстаранамі на вышыні птушынага палёту.

У Абу-Дабі знаходзяцца знакамітая мячэць шэйха Зайда і філіял Луўра, шыкоўны пляж і запаведнік на востраве Саадыят. У Рас-эль-Хайме – унікальная прырода, горы і самы доўгі зіплайн у свеце. Плюс у лістападзе – снежні пройдзе чэмпіянат свету ў футболе ў Катары, і многія збіраюцца ў Дубай, каб зручна даляцець адтуль у Доху на самалётах-маршрутках Qatar Airways.

У кастрычніку чартары з Менска ў Шарджу будуць лётаць пяць разоў на тыдзень, а з канца наступнага месяца і да траўня – штодня. Час у палёце – блізу шасці гадзінаў. Для ўезду ў Эміраты спатрэбяцца пашпарт, сапраўдны цягам шасці месяцаў пасля вяртання, сертыфікат аб вакцынацыі двухкампанентнай вакцынай, сапраўдны цягам года пасля другой дозы (адлік пачынаецца з 15-га дня пасля другой дозы), або ПЛР-тэст з адмоўным вынікам, зроблены менш чым за 48 гадзінаў да вылету.

Што да самога знаходжання, то колькасць абмежаванняў ва ўсіх эміратах, акрамя Абу-Дабі, зведзеная да мінімуму. Маскавы рэжым плануюць поўнасцю скасаваць сёння.

А што з экзотыкай?

Самымі папулярнымі экзатычнымі кірункамі ў гэтым сезоне з'яўляюцца астравы Індыйскага акіяна: Шры-Ланка, Занзібар і Мальдывы. Дабрацца на выспы можна пералётам з Менска з перасадкай у Шарджы, Дубаі, Стамбуле або з вылетам з Масквы. Тым часам курорты Карыбскага мора сталі вельмі цяжкадаступнымі і дарагімі праз цяжкасці з пералётамі. Дабрацца ў Дамініканскую Рэспубліку ці Мексіку прасцей і танней за ўсё з Варшавы, калі ёсць шэнген.

– Шры-Ланка прапануе самы даступны экзатычны адпачынак з акіянскімі пляжамі, трапічнай садавіной, экскурсіямі і сафары, а таксама аюрведычнымі спа-рытуаламі. Кошт тыднёвага адпачынку стартуе ад 3500 рублёў за поўны пакет на аднаго чалавека ў двухмесным нумары, – адзначае Яўген Сазыкін.

Занзібар – сапраўдная перліна Індыйскага акіяна з афрыканскім каларытам. Кошт тура з Менска – ад 4500 рублёў, уключаючы пералёт, размяшчэнне, трансфер, сняданкі і страхоўку.

Таксама даволі даступнымі застаюцца Мальдывы з адасобленымі рамантычнымі віламі на беразе акіяна або тусовачнымі рэзортамі з начнымі клубамі і жывой музыкай. Кошт тураў на райскія астравы пачынаецца ад 5500 рублёў за чалавека.