Падрыў «Паўночнага струменю»: Міны спусцілі на доўгай вяроўцы, скінутай за борт лодкі
24- 29.09.2022, 11:16
- 18,456
У Швэцыі знайшлі чацвёртую выцечку газу з трубаправода.
Швэдская берагавая ахова выявіла чацвёртую выцечку на газаправодзе «Паўночны струмень».
Пра гэта піша Sky News.
Дзве выцечкі знойдзеныя ў выключнай эканамічнай зоне Швэцыі, астатнія дзве – у дацкай эканамічнай зоне.
«Падазраваныя акты сабатажу супраць газаправодаў у Балтыйскім моры, верагодна, былі наўмыснымі атакамі з выкарыстаннем падводных выбуховых прыладаў з дыстанцыйным падрывам», – паведамілі Sky News крыніцы ў брытанскай абароне.
Яны сказалі, што міны маглі быць спушчаныя на доўгай вяроўцы, скінутыя за борт лодкі або размешчаныя побач з трубаправодамі з дапамогай падводнага беспілотніка некалькі месяцаў ці нават гадоў таму.
Падрыў трубаправодаў «Паўночнага струменю» – што вядома
Пасля паведамленняў кампаніі-аператара Nord Stream пра рэзкае падзенне прапускной здольнасці ў абедзвюх нітках газаправода «Паўночнага струменю» з'явілася інфармацыя пра некалькі выбухаў у раёне трубаправода.
Выцечку звязалі з выяўленымі ў трубах дзіркамі, якія маглі быць, паводле паведамлення ўрадаў Швэцыі і Даніі, вынікам мэтанакіраванага падрыву.
Пазней Служба бяспекі Швэцыі адзначыла, што за гэтым «стаіць замежная дзяржава».
І хоць у еўрапейскіх спецслужбаў ёсць факты актыўнасці ВМФ Расеі ў тым раёне, здарэнне пакуль з Расеяй афіцыйна не звязваюць. У той самы час у Мінабароны Брытаніі наўпрост заявілі пра датычнасць РФ да падрыву трубаправодаў. Яна, як мяркуецца, мае як магчымасць, так і матывацыю для наўмыснага пашкоджання трубаправодаў.
І Данія, і Швэцыя праводзяць расследаванне, але агляд месца яшчэ не праведзены, і падрабязнасці, што менавіта выклікала выбухі, застаюцца ўрыўкавыя. Ціск у трубах абцяжарвае набліжэнне да месца выцечкі.