У кампанію «Белагра» прыйшлі сілавікі
5- 29.09.2022, 12:16
- 15,616
Прычына пакуль невядомая.
У офіс кампаніі «Белагра» раніцай 29 верасня прыйшлі сілавікі, некаторых супрацоўнікаў затрымалі. Пра гэта «Зеркалу» напісалі некалькі чытачоў, такую ж інфармацыю апублікавалі тэлеграм-каналы, блізкія да сілавікоў.
Як расказалі нам супрацоўнікі «Белагра», у офіс кампаніі сілавікі прыйшлі блізу 9 раніцы. Кіраўніцтва затрымалі адразу ж, у астатніх супрацоўнікаў сталі правяраць тэлефоны. Падпісаных на «экстрэмісцкія» тэлеграм-каналы затрымлівалі.
Дакладнай прычыны супрацоўнікі «Белагра» не ведаюць. Мяркуюць, што візіт сілавікоў можа быць звязаны з падтрымкай кіраўніцтвам і супрацоўнікамі пратэсту ў 2020 годзе. Фармальная прычына, пра якую сказалі супрацоўнікам кампаніі, – «нявыплата падаткаў».
– Прыйшлі з эканамічнымі пытаннямі, але мы здагадваемся, што праз палітыку, бо многія з офіса хадзілі на пратэсты ў 2020-м, – расказаў адзін з супрацоўнікаў кампаніі.
Яшчэ адзін супрацоўнік кампаніі паведаміў, што прыход сілавікоў можа быць звязаны з былым кіраўніком прэзідэнцкага пула журналістаў Дзмітрыем Семчанкам. Да затрымання ён працаваў у гэтай арганізацыі.
– Наколькі я правільна пачуў ад сілавікоў, да нас прыйшлі праз Семчанку. Спрацавалі выбарачна: адразу забралі тых, хто іх цікавіў, палову офіса, а потым пачалі глядзець тэлефоны ў астатніх. У каго былі падпіскі забароненыя, таксама забралі. Што ставяць у віну, не ведаю, – расказаў суразмоўца.
Пра сувязь з Дзмітрыем Семчанкам таксама паведаміў набліжаны да сілавікоў тэлеграм-канал.