Беларускія вайскоўцы закупляюць дровы для палявых мерапрыемстваў

Яны пройдуць у абласцях, якія мяжуюць з Украінай.

«Барысаўская эксплуатацыйная ўправа Узброеных Сіл» размясціла аб'яву аб закупцы дроў колатых. Мэта - «забеспячэнне правядзення мерапрыемстваў у палявых умовах у Гомельскай вобласці, Берасцейскай вобласці і розных раёнах Рэспублікі Беларусь», - паведамляе ex-press.by.

Піламатэрыялы для абагрэву збіраюцца выкарыстоўваць з канца кастрычніка да канца снежня гэтага года. Агульная прыблізная сума закупкі складае 162 900 рублёў, аб'ём - 900 кубаметраў паліўнай драўніны.

Агулам кубічны метр дроў важыць ад 550 да 650 кг. Калі ўзяць сярэдняе значэнне, то вага закупленых дроў складзе 540 тон. Пры выдатку на ацяпленне аднаго вайсковага намёта, які вар'юецца ў значэннях ад 1 да 5 кг драўніны на гадзіну, атрымліваецца, што дроў выстарчыць на 108-540 тысяч гадзін або 4500-22500 дзён.

Паколькі драўнінай, якая закупляецца, будуць абагравацца два месяцы (60 дзён), шляхам няхітрых вылічэнняў можна выказаць здагадку, што колькасць дроў разлічаная на 75-375 вайсковых намётаў.

У вялікіх вайсковых намётах, на абаграванне якіх пойдзе максімум драўніны, можа змясціцца ад 10 да 36 чалавек. Гэта значыць, амаль 750-2700 чалавек змогуць паўдзельнічаць у «мерапрыемствах у палявых умовах у Гомельскай, Берасцейскай вобласці і розных раёнах» напярэдадні Новага года ў лясах Беларусі.