WSJ: Пуціну давялі да ведама, што расейцы стрываюць яшчэ адну мабілізацыю

У Расеі могуць заклікаць яшчэ 500 тысяч чалавек.

Расейцы гатовыя стрываць яшчэ адну хвалю мабілізацыі. Пра гэта кажуць закрытыя апытанні грамадскай думкі, якія кладуцца на стол вышэйшаму кіраўніцтву РФ і крамлёўскім службам, паведамляе The Wall Street Journal са спасылкай на блізкія да Крамля крыніцы.

Пасля серыі буйных паражэнняў ва Украіне першая хваля мабілізацыі прадказальна абрынула падтрымку вайны ў грамадстве - да 34%.

Але ўжо ў лістападзе, пасля таго як улады абвясцілі прызыў у войска скончаным, колькасць расейцаў, якія ўхваляюць вайну, зноў падскочыла да 80%.

Унутраныя апытанні Крамля паказваюць, што расейцы зазнаюць яшчэ адну хвалю мабілізацыі, заявіў WSJ былы крамлёўскі чыноўнік.

Першая для Расеі з 1941 года мабілізацыя забрала з сем'яў сотні тысяч чалавек, многія з якіх ужо загінулі на фронце.

Нягледзячы на гэта, машына дзяржаўнай прапаганды працягвае працаваць, прыгнятаючы ў грамадскай свядомасці нават базавы інстынкт самазахавання.

«Прапаганда прымяншае страты вайны, - канстатуе Леў Гудкоў, дырэктар «Левада-цэнтра». - На штодзённым узроўні цяпер вайна не правакуе ні моцнай трывогі, ні пратэстаў».

У канцы снежня Уладзімір Пуцін заявіў, што з 300 тысяч чалавек, якія патрапілі пад мабілізацыю, чвэрць ужо знаходзіцца на лініі баявых дзеянняў. Тады ж ён зацвердзіў пастанову павялічыць колькасць расейскага войска яшчэ на 350 тысяч чалавек, да 1,5 млн. Аналагічны ўказ быў падпісаны за месяц да вераснёўскай мабілізацыі, нагадвае дырэктар праваабарончай арганізацыі «Грамадзянін. Войска. Права» Сяргей Крывенка.

Сцэнар можа паўтарыцца і на гэты раз, мяркуе Крывенка: «Да лета спатрэбіцца папаўненне, Мінабароны спатрэбяцца новыя салдаты. Каб падрыхтаваць іх, акурат і спатрэбіцца тры-чатыры месяцы».

Новую хвалю мабілізацыі могуць абвясціць ужо ў студзені. Як распавялі выданню The Times крыніцы ў заходняй выведцы, яе маштабы могуць быць нават большыя за першую хвалю — да 500 тысяч чалавек. Павелічэнне кантынгенту неабходнае, каб расейскае камандаванне магло пачаць маштабнае наступленне. Кампанія можа стартаваць у красавіку.