Футбольнаму клубу «Шахцёр» выстаўляюць рахункі

Чэмпіён Беларусі некалькі гадоў не плаціў менскаму гатэлю за начлегі перад матчамі.

Салігорскі футбольны клуб «Шахцёр» завінаваціўся роднаму гораду за арэнду стадыёна «Будаўнік», піша «Трыбуна».

Таксама ў каманды ёсць неаплачаныя рахункі за некалькі гадоў, выстаўленыя менскім гатэлем «Вікторыя Алімп». Доўгі час футбалісты прыязджалі ў Менск за дзень да матча і начавалі ў гэтым атэлі. Цяпер нумар з двума ложкамі плюс сняданак у «Вікторыя Алімп» каштуюць прыкладна 200 рублёў за дзень. У такія нумары звычайна селяць футбалістаў. Аднамесны нумар для галоўнага трэнера каштуе блізу 180 рублёў.

Стаміўшыся прымаць салігорцаў у пазыку, «Вікторыя Алімп» зачынілі перад імі дзверы.

Пасля гэтага «Шахцёр» аблюбаваў гатэль Mariott. У ім двухасабовы нумар каштуе ад 190 даляраў за дзень, а аднаасабовы — ад 170 даляраў. Як піша Tribuna.com, у гэтым гатэлі клуб таксама жыў у пазыку, якая пакуль не выплачаная.

Раней сайт Charter97.org пісаў аб затрыманні былога спартыўнага дырэктара «Шахцёра».