«Маёр загінуў, камбат паранены»: расейцы панікуюць пад Сватавам
8- 27.01.2023, 9:28
- 11,036
Мабілізаваныя ў масавым парадку гінуць праз дзеянні камандавання РФ.
У Расеі цяжкая сітуацыя на Сватаўскім кірунку фронту, дзе мабілізаваных расейцаў кідаюць з аўтаматамі пад удары артылерыі УСУ. У выніку цяжкіх страт гіне лакальнае камандаванне, а мабілізаваныя панічна разбягаюцца ў адступленні.
Пра гэта ў сваім Telegram-канале паведаміла расейская прапагандыстка Настасся Кашаварава.
«І зноў прыходзіць шмат паведамленняў пра Сватаўскі кірунак. Я размаўляла і з жонкамі, і з байцамі, і з вышэйшым кіраўніцтвам. Усё пацверджана», - піша яна.
Са слоў прапагандысткі, кіраўніцтва войска проста адпраўляе расейцаў на забой.
«Аддаюцца загады кіраўніцтвам, якое не знаходзіцца на пазіцыях. У выніку мы з аўтаматамі ідзём супраць артылерыі. Ні ўзяць пункт не можам, ні захаваць асабовы склад. Пустая і нават, я б сказала, "злачынная" растрата чалавечага рэсурсу. Гінуць і шарагоўцы, і нашы афіцэры. Маёр М…вец загінуў, забяспечваючы адыход салдат, прыкрываў хлопцаў. Камбат, капітан Ма...наў атрымаў раненне. У нас так шмат маёраў? І капітанаў?» - абураецца яна.
Са слоў прапагандысткі, пасля выпадкаў, калі расейскім камандаваннем ставіцца невыканальны і нерэалістычны загад, батальён і рота застаюцца без камандавання, якое гіне.
Расейскія мабілізаваныя пасля страт дэзарыентаваныя і шукаюць сваіх, аднак іх ізноў адпраўляюць на ранейшыя пазіцыі без стратэгіі і без прычынення, толькі з аўтаматам. У выпадку адмовы іх абвяшчаюць дэзерцірамі з рызыкай далейшага крымінальнага пераследу.
Як? Як паступаць у такой сітуацыі? - абураецца расейка.