Зяленскі заклікаў супольнікаў не цягнуць з пастаўкамі Abrams ва Украіну
1- 27.01.2023, 21:59
- 5,020
«Можа быць занадта позна».
У Злучаных Штатах Амерыкі зафіксавалі перамяшчэнне эшалона з вайсковай тэхнікай, у тым ліку цяжкімі танкамі Abrams і БМП Bradley, але прэзідэнт Украіны Уладзімір Зяленскі заклікаў краіны Захаду скараціць інтэрвал паміж прыняццем пастаноў аб пастаўках танкаў і рэальнай іх перадачай.
Як паведамляе «Апостраф», пра гэта кіраўнік украінскай дзяржавы распавёў у інтэрв'ю тэлеканалу Sky News.
Зяленскі адзначыў, што частка зброі, якую паабяцалі паставіць партнёры, ужо ва Украіне, але частка ўсё яшчэ не даехала.
- Колькасць танкаў і тэрмін, калі яны да нас могуць даехаць, адыгрываюць неад'емную і звышважную ролю ў параўнанні з тым, якая і калі была прынятая пастанова, - сказаў ён.
Ён таксама згадаў тэрміны пастаўкі танкаў Abrams з боку ЗША, адзначыўшы, што баявая тэхніка можа прыбыць ва Украіну занадта позна.
- Позна. Але я не ведаю рэальнай сітуацыі ў гэтую хвіліну, калі яны павінны быць, калі Амерыка дасць нам Abrams. І я не ведаю рэальна, калі менавіта прыбудуць танкі з Еўропы, - сказаў прэзідэнт Украіны.
Варта адзначыць, што прадстаўнік Белага дома ў пытаннях нацыянальнай бяспекі Джон Кірбі заявіў CNN, што пастаўка танкаў Abrams «зойме шмат месяцаў», адмовіўшыся адказваць, ці верыць ён, што танкі разгорнуць ва Украіне хаця б да канца 2023 года.
- Я не хачу ўдавацца ў канкрэтыку, паколькі мы дагэтуль распрацоўваем планы, але гэта зойме шмат месяцаў, - сказаў Кірбі.