Кожны шосты жыхар Беларусі – пажылы

Многія беларусы вымушаны працаваць на пенсіі.

У Беларусі і ва ўсім свеце 1 кастрычніка адзначаецца Міжнародны дзень пажылых людзей. Белстат апублікаваў да даты афіцыйны статыстычны агляд, у якім ёсць цікавыя лічбы аб гэтай катэгорыі грамадзян.

Усяго на пачатак гэтага года ў Беларусі пражываў 1 мільён 517 тысяч пажылых людзей (ва ўзросце 65 гадоў і старэй; адзначым што ААН і САЗ лічаць пажылымі людзей старэйшых за 60 – гэта значыць фактычна ў нашай краіне іх нават больш). Паводле падлікаў Белстата, кожны шосты жыхар краіны – пажылы.

27,6% пажылых беларусаў пражываюць у сельскай мясцовасці, астатнія – у гарадах. Дзве траціны з іх ліку – жанчыны (магчыма, гэта тлумачыцца прыкметна ніжэйшай працягласцю жыцця мужчын у нашай краіне). Найбольш пажылых у Менску (больш за 300 тысяч) і Мінскай вобласці (больш за 230 тысяч), найменш – на Магілёўшчыне (168 тысяч).

Паводле інфармацыі Белстата, у 2022 годзе доля асоб ва ўзросце 65-74 гадоў склала 1,9% ад агульнай колькасці «занятых у эканоміцы» краіны людзей (агульная колькасць працоўных пажылых не прыводзіцца). Лідзіруе па гэтым паказчыку сфера адукацыі (4,3% працоўных у сферы – пажылога ўзросту).

Далей ідзе сфера аховы здароўя і сацыяльных паслуг (3,6%), на трэцім месцы – прафесійная, навуковая і тэхнічная дзейнасць (3,2%).