У нацыянальным парку «Белавежская пушча» надумалі зрабіць рэбрэндынг

Што зменіцца.

У нацыянальным парку "Белавежская пушча" пачалася рэканструкцыя ўязной брамы, пра гэта паведамляе інфармацыйны партал Камянецкага раёна. Але гэта толькі частка змен, якія чакаюць турыстаў.

Будаўнікі ўжо прыступілі да дэмантажу старой канструкцыі. Новую ўязную браму плануюць устанавіць да Новага года.

Акрамя таго, на тэрыторыі комплексу з'явяцца дзве невялікія крамкі - яны размесцяцца з левага боку ад уваходу. У планах - будаўніцтва інфацэнтра і пункта пракату. Праўда, тэрмін іх з'яўлення не называецца - усё залежыць ад фінансавання.

Нагадаем, што пераўтварэнне гэтай тэрыторыі вядзецца ў рамках маштабнага рэбрэндынгу Белавежскай пушчы, распачатага гэтым летам.

Убачыць зубра

У Белавежскай пушчы падлічылі зуброў. Жывёл адсочвалі «з дапамогай аптычных сродкаў назірання», а таксама фатаграфавалі з квадракоптара.

У выніку на пачатак года ў Белавежскай пушчы налічылі 730 зуброў - і гэта на 27 больш, чым у 2022-м. Прычым тэндэнцыя да росту папуляцыі назіраецца не першы год.

У зубровым пагалоўі парка, відавочна, пануе матрыярхат: там 374 самкі і ўсяго сотня самцоў. Таксама ўлічаны 153 асобіны маладняку (узростам 1,5–3,5 года) і 103 цяляці.