Еўрадэпутатка: Паліна Шарэнда-Панасюк працягвае супраціўляцца!

Сусветная супольнасць павінна змагацца за вызваленне вязняў рэжыму Лукашэнкі.

Лукашысты прысудзілі актывістцы грамадзянскай кампаніі «Еўрапейская Беларусь» Паліне Шарэндзе-Панасюк год і тры дні калоніі за «непадпарадкаванне турэмнай адміністрацыі». Еўрадэпутатка ад Партугаліі, «хросная» палітычнай зняволенай Ізабэль Сантуш адрэагавала на незаконны прысуд:

- Нягледзячы на ўсе намаганні, Паліна зноў была асуджаная ў Беларусі, гэтым разам - на 1 год і 3 дні пазбаўлення волі за «непадпарадкаванне адміністрацыі пенітэнцыярнай установы», дзе яна ўтрымліваецца.

Паліна ў сваім выступе ў судзе звярнула ўвагу на тое, што яна называе «канцэнтрацыйным лагерам XXI стагоддзя для жанчын», улічваючы бесчалавечнае абыходжанне, якое яна зазнае ў турме ў Рэчыцы.

І заклікала міжнародную супольнасць зрабіць усё магчымае, каб вязні Лукашэнкі, затрыманыя пасля пратэстаў супраць сфальсіфікаваных выбараў 2020 года, былі вызваленыя. Паліна працягвае супраціўляцца!