NATO ўзмацняе патруляванне Балтыйскага мора

Праз пашкоджанне газаправода Balticconnector.

Паўночнаатлантычны альянс пастанавіў узмацніць патруляванне Балтыйскага мора пасля таго, як там быў пашкоджаны газаправод Balticconnector.

Пра гэта заявіў выканаўца абавязкаў прэс-сакратара NATO Дылан Уайт, паведамляе Charter97.org са спасылкай на прэс-службу Альянсу.

Паводле ягоных словаў, узмацненне патрулявання прадугледжвае дадатковыя наглядныя і выведныя палёты, у тым ліку з выкарыстаннем марскіх патрульных самалётаў, самалётаў AWACS (самалёты, абсталяваныя авіяцыйным комплексам радыёвыяўлення і навядзення) і беспілотнікаў.

Таксама ў раён Балтыйскага мора накіраваная флатылія з чатырох мінных тральнікаў (карабель для знішчэння марскіх мінаў).

«Мы прадаўжаем уважліва сачыць за сітуацыяй і знаходзімся ў цесным кантакце з нашымі хаўруснікамі Эстоніяй і Фінляндыяй, а таксама з нашай партнёркай Швэцыяй. NATO прадоўжыць адаптаваць сваю марскую пазіцыю ў Балтыйскім моры і зробіць усе неабходныя крокі для арганізацыі бяспекі хаўруснікаў», – падкрэсліў Уайт.