Якой СПА абаранілі Кіеў перад зімой: выкрытыя сакрэты ўкраінскага «Жалезнага купала»

Украіна пераможа ў «зімовай бітве».

Кіраўнік Кіеўскай мескай вайсковай адміністрацыі (КМВА) Сяргей Папко растлумачыў асаблівасць ўкраінскага «Жалезнага купала» — шматузроўневай камбінацыі з сістэм СПА, якой Украіна атачыла сталіцу перад зімой.

Раней прэзідэнт Украіны Уладзімір Зяленскі выказаў упэўненасць, што Украіна пераможа ў «зімовай бітве» — управіцца са шквалам паветраных удараў па ўкраінскай крытычнай і жылой інфраструктуры, да якіх РФ, мабыць, ізноў звернецца, бо на гэтым грунтуецца яе «тактыка».

У інтэрвію ТСН Сяргей Папко пацвердзіў, што сталіца Украіны — Кіеў — зазнала найбольшую колькасць маштабных налётаў і паветраных атак за ўсю гісторыю сучасных войнаў.

«Такой колькасці маштабных налётаў з ужываннем такога сучаснага і магутнага ўзбраення не ведала ніводнае места ў гісторыі войнаў», — заявіў ён.

Здалелі стрымаць беспрэцэдэнтную колькасць удараў дронамі і ракетамі розных мадыфікацый. Была і балістыка, і крылатыя баявыя галоўкі, і ракеты, якія лятуць аэрабалістычнымі траекторыямі. Войска РФ выкарыстоўвала шмат тактык: выпускала сваю зброю з розных кірункаў, камбінавала атакі, выпускаючы адначасова БЛА разам з ракетамі, спрабавала біць па Украіне хвалямі, каб забіць як мага больш украінцаў, пералічыў Папко.

Паводле ягоных слоў, больш за ўсё акупанты хацелі пазбавіць кіян вады, святла, цяпла. Іншымі словамі, падштурхнуць сталіцу да гуманітарнай катастрофы.

Перад пачаткам зімы Кіеў, як і іншыя месты Украіны, спрабуе максімальна ўзмацніць свой «Жалезны купал», каб даць адпор акупантам. З гэтай мэтай лідэр Украіны Уладзімір Зяленскі ездзіў з візітам у ЗША, дамовіўшыся аб супольным вырабе сістэм СПА на ўкраінскіх тэрыторыях, згадаў кіраўнік КМВА. "Паводле прагнозаў, першыя вынікі чакаюцца ўжо пад канец 2023 года", — удакладніў ён.

На гэты момант вакол Кіева створаная шматузроўневая сістэма абароны неба: спакой украінцаў ахоўваюць мабільныя агнявыя групы і ЗРК розных мадыфікацый. У распараджэнні сталіцы ёсць: ЗРК — "Аса", "Avenger"; ПЗРК – "Piorun", "Ігла", "Страла", Stinger, Martlet, RBS —70; САУ "Gepard", СУ "Шылка", ЗП-23 і гэтак далей.

— З зенітна-ракетных комплексаў: С-300, "Бук", С-125, "NASAMS", "IRIS-T", "Crotale", "Patriot". Мы сістэматычна і спланавана павышаем эфектыўнасць СПА Кіева, — заявіў Папко.

Разам з тым ён папярэдзіў украінцаў, што нават самая магутная сістэма супрацьпаветранай абароны, нават усім вядомы «Жалезны купал», якім абараняе сваё неба Ізраіль, не можа на 100% гарантаваць бяспеку для насельніцтва. Ніхто не мае ігнараваць паветраныя трывогі, разлічваючы на абарону СПА. Варта неадкладна ісці ў сховішча.

«Трывогі гучаць, калі пагражае рэальная небяспека. Таму ўсе павінны быць адказныя за сваё жыццё і жыццё ды здароўе сваіх родных і блізкіх», — заявіў кіраўнік Кіеўскай вайсковай адміністрацыі.