Аэрадром «Лунінец» пастанавілі прыкрыць ад беспілотнікаў?

Лукашысты ў паніцы.

Вайсковы канал апублікаваў відэа з аэрадрома «Лунінец», дзе размяшчаецца 56-ы зенітны ракетны полк узброеных сілаў Беларусі. Акрамя ўсяго іншага, на відэа можна ўбачыць сродкі, якія ўжываюцца для прыкрыцця аэрадрома ад беспілотных лятальных апаратаў, заўважыў Telegram-канал «Беларускi Гаюн».

Да прыкладу, мабільны зенітны артылерыйскі комплекс 2К20 «Зеніт» уяўляе сабой спараную 23–мм зенітную ўстаноўку ЗУ-23-2, змантаваную ў кузаве аўтамабіля «Урал-43202». Комплекс прызначаны для паразы і знішчэння жывой сілы, лёгкабраняванай тэхнікі, малавышынных лятальных апаратаў супраціўніка.

Радыёэлектронная стрэльба для барацьбы з мультыкоптарамі «Навальніца-Р2» прызначаная для спынення палёту мультыкоптараў (пасадка або падзенне) за кошт радыёглушэння каналаў кіравання і навігацыі (GPS, GLONASS, BeiDou, Galileo).

Пераносны зенітны ракетны комплекс «Ігла» прызначаны для знішчэння паветраных цэляў, якія нізка ляцяць на сустрэчных і дагонных курсах ва ўмовах цеплавых перашкод.

Нагадаем, што аб фармаванні 56-га зенітнага ракетнага палка (в/ч 10198) стала вядома ў канцы сакавіка 2023 года.