Данілаў расказаў, калі сітуацыя на полі бою ва Украіне кардынальна зменіцца

На думку сакратара РНБА Украіны, ні аб якіх перамовах не можа быць і гаворкі.

Сітуацыя на полі бою можа кардынальна змяніцца, як толькі Украіна атрымае знішчальнікі F-16. Аб гэтым заявіў сакратар Рады нацыянальнай бяспекі і абароны Украіны Аляксей Данілаў, паведамляе РБК-Украіна са спасылкай на інтэрв'ю выданню Kyodo News.

Ён выказаў упэўненасць, што «сітуацыя кардынальна зменіцца» пасля таго, як з Захаду прыбудуць знішчальнікі F-16 для ўмацавання ўкраінскай СПА. Пры гэтым Данілаў прызнаў, што цяжка прадказаць час, неабходны для дэакупацыі ўсёй тэрыторыі Украіны.

«Пакуль Расея працягвае акупаваць тэрыторыю, уключаючы Крым, ні пра якія перамовы не можа быць і гаворкі», - заявіў Данілаў.

F-16 для Украіны

Нідэрланды і Данія ўзначалілі намаганні па навучанні ўкраінскіх пілотаў на знішчальніках F-16. Нарвегія і Бельгія таксама абавязаліся паставіць Украіне F-16, а 11 іншых краін, у тым ліку ЗША, заявілі, што дапамогуць навучаць украінскіх пілотаў.

Як раней заяўлялі ва ўкраінскім Мінабароны, Украіна можа атрымаць першыя самалёты F-16 не раней чым праз 6-7 месяцаў. Аднак у Нідэрландах і Даніі абяцалі перадаць першыя самалёты ў пачатку 2024 года.

Спікер камандавання Паветраных сіл УСУ Юрый Ігнат сказаў, што ўкраінскія пілоты цяпер праходзяць трэнажорную падрыхтоўку на знішчальніках F-16 Пры гэтым ужо праз некалькі тыдняў яны могуць прыступіць да палётаў з інструктарам на рэальных самалётах.