СМІ: Арменія абвесціць Пуціна ў вышук адпаведна з ордэрам з Гаагі

Парламент Арменіі ратыфікаваў Рымскі статут.

Парламент Арменіі ратыфікаваў Рымскі статут Міжнароднага крымінальнага суда (МКС). Аб гэтым 3 кастрычніка паведамляюць мясцовыя СМІ. Трансляцыя вялася на сайце парламента.

У абмеркаваннях ратыфікацыі ўзяла ўдзел толькі фракцыя Нікола Пашыняна «Грамадзянская дамова». Апазіцыйныя фракцыі выступілі з заявай і асудзілі пастанову, зазначыўшы, што такім крокам яны падстаўляюць пад удар стасункі з Расеяй.

Фракцыі «Арменія» і «Гонар маю» пакінулі залу паседжанняў падчас абмеркавання статуту і не бралі ўдзел у галасаванні, паведамляе The Moscow Times.

Выданне адзначае, што «пасля страты Нагорнага Карабаха Арменія абвесціць Пуціна ў вышук адпаведна з ордэрам з Гаагі».

«Гэта не з'яўляецца крокам супраць Расеі, а звязанае з пытаннямі нашай бяспекі», - падкрэсліў прэм'ер-міністр Арменіі Нікол Пашынян.

Ён казаў, што Арменія пачала працэс ратыфікацыі яшчэ ў снежні 2022 года. «Адбылося няўдалае супадзенне ў кантэксце дачыненняў Расеі і МКС», - адзначыў ён.

У сакавіку суд у Гаазе выдаў ордэр на арышт прэзідэнта РФ Уладзіміра Пуціна паводле падазрэння ў незаконнай дэпартацыі ўкраінскіх дзяцей. На яго думку, АДКБ не выканала і не выконвае сваіх абавязацельстваў перад рэспублікай.