Лукашэнку да трапа ў Зімбабвэ праводзіў казёл

Ён служыць у мясцовым войску.

Прэс-служба Аляксандра Лукашэнкі апублікавала відэа з сённяшнімі провадамі палітыка ў зімбабвійскім аэрапорце Вікторыя-Фолс. Цырымонія, якая вянчала сабой візіт Лукашэнкі ў афрыканскую дзяржаву, праходзіла пад музыку ваеннага аркестра, у шэрагах якога быў заўважаны прыгожы казёл з пафарбаванымі ў чырвоны колер рогамі, капытамі і хвастом. «Люстэрка» разабралася, адкуль там узялася гэтая жывёліна.

Лукашэнка пакінуў Зімбабвэ 1 лютага 2023 года пасля візіту ў гэтую краіну, які доўжыўся некалькі дзён. Як заўважна на відэа, вылятаў ён не са сталічнага аэрапорта імя Роберта Мугабэ ў Харарэ, а з турыстычнага аэрапорта Вікторыя-Фолс ва ўсходняй частцы краіны, пабудаванага за 18 кіламетраў ад сусветна вядомага вадаспаду Вікторыя.

Казёл, які ўдзельнічаў у развітальнай цырымоніі з палітыкам, добра вядомы ў Зімбабвэ. Гэта малодшы шараговец Хумала – маскот (талісман) зімбабвійскага войска. У яго ёсць афіцыйнае воінскае званне, казёл атрымлівае заробак і нават мае права на атрыманне воінскіх ушанаванняў у выпадку смерці. Выступы з удзелам малодшага шарагоўца Хумалы папулярныя сярод зімбабвійцаў. Ён навучаны маршаваць пад музыку, выконвае элементы страявой падрыхтоўкі і з гонарам носіць ваенную форму – гуньку ахоўнага колеру з абрэвіятурай ZNA (Zimbabwe National Army – «Нацыянальнае войска Зімбабвэ»).