У Энэргадары партызаны ўзарвалі аўтамабіль з «мусарком»-калабарантам
10- 3.02.2023, 10:04
- 7,596
Сярод акупантаў пачалася паніка.
Сёння раніцай у адным з раёнаў акупаванага Энэргадара прагрымеў выбух. Як сцвярджае калабарант і гаўляйтэр Дзмітрый Рогаў, падарваўся аўтамабіль.
Папярэдне, у выніку выбуху загінуў адзін чалавек. На месца выбуху прыбылі расейскія сілавікі.
Калабарант Рогаў піша, што выбухная хваля пашкодзіла вокны ў суседніх дамах і знішчыла як мінімум адзін аўтамабіль, прыпаркаваны побач.
Акупацыйныя ўлады пішуць пра «тэракт». Месца абследуюць на наяўнасць узрыўчаткі.
Разам з тым «РІА-Мелітопаль» сцвярджае, што аўто належала мясцоваму калабаранту, былому міліцыянеру Яўгену Кузьміну, які пайшоў у карныя органы захопнікаў пасля акупацыі горада.
Мэр Мелітопаля Іван Фёдараў расказаў падрабязнасці выбуху аўто ў Энэргадары. Паводле ягоных слоў, у падарваным аўтамабілі знаходзіўся мясцовы калабарант.
«Сёння хачу пачаць з таго, што іх (акупантаў - рэд.) ліквідацыя ідзе кожны дзень. Напрыклад, сёння ў акупаванай частцы Запарожскай вобласці, а менавіта ў Энэрадары а 07:30 быў знішчаны аўтамабіль, а можа і не толькі аўтамабіль аднаго з калабарантаў, гаўляйтэраў. Пакуль гэтыя дэталі ўдакладняюцца, крыху пазней мы пра іх абавязкова паведамім», - заявіў ён у эфіры тэлемарафону.