«Газпром» засакрэціў статыстыку пасля падзення экспарту да мінімуму з савецкіх часоў

Даўней кампанія публікавала статыстыку продажу раз на два тыдні.

"Газпром" перастаў публікаваць аперацыйныя звесткі аб аб'ёмах здабычы і экспарту газу, якія ў 2022 годзе абрынуліся рэкордна за ўсю гісторыю айчыннай газавай прамысловасці, піша The Moscow Times.

Газавая статыстыка, якую кампанія традыцыйна публікавала раз на два тыдні, даючы справаздачу аб продажу і вытворчасці, перастала з'яўляцца на сайце «Газпрома» са студзеня 2023 года.

Апошні раз «Газпрам» падаў звесткі 15 снежня: яны паказалі, што за два тыдні апошняга месяца 2022 года здабыча газу спусцілася на 24% год да года, да 17,2 млрд кубамэтраў, а экспарт упаў на 60%, да 2,6 млрд кубоў. Назапашаным вынікам за 11,5 месяцаў "Газпром" страціў 20% здабычы і 45% экспарту.

За мінулы год «Газпром» прадаў у далёкае замежжа 101 млрд кубамэтраў газу - удвая менш, чым годам раней, даваў справаздачу ў студзені кіраўнік кампаніі Аляксей Мілер.

Пры гэтым пастаўкі ў Турцыю і еўрапейскім краінам – некалі найбольшым кліентам "Газпрома" – склалі толькі 85 млрд кубамэтраў і сталі самымі нізкімі ў сучаснай гісторыі Расеі паводле ацэнкі BCS Global Markets.

Для параўнання: у 1991 годзе "Газпром" прадаў у Еўропу 110 млрд кубамэтраў, а ў дыяпазоне паміж 70-110 млрд кубоў штогод экспарт знаходзіўся ў 1985-1991 гадах, калі разбуралася імперыя СССР.

У наступным годзе экспарт "Газпрома" ў Еўропу і Турцыю можа знізіцца да 60 млрд кубаметраў, прагназуе Міжнароднае энэргетычнае агенцтва. Гэта будзе найніжэйшы ўзровень з 1980-85 гадоў.

Адлучыўшы газ амаль усім еўрапейскім краінам, прэзідэнт Расеі Уладзімір Пуцін за адзін год зліквідаваў для "Газпрома" найбуйнейшы рынак збыту, на будаўніцтва якога спатрэбілася больш за 50 гадоў.

Расейскія ўлады заяўляюць аб планах перанакіраваць газ у Кітай, але той пакуль кампенсуе толькі адну сёмую аб'ёмаў, якія закупляла Еўропа. Налета, згодна з планам эксплуатацыі "Сілы Сібіру", яны вырастуць да 22 млрд кубамэтраў, тады як у ЕЗ у 2021 годзе было прададзена 155 млрд кубоў.