Чаму шпіёнскі паветраны шар Кітая з'явіўся ў небе ЗША менавіта цяпер

The Washington Post мяркуе, што гэты інцыдэнт можа пайсці на карысць Вашынгтону.

Выведныя аналітыкі адрозніваюць таямніцы і загадкі. Дзіўны кітайскі паветраны шар праляцеў над ЗША, пасля чаго яго збілі ў нядзелю над атлантычным узбярэжжам. І гэты эпізод уключае ў сябе абодва элементы.

Публічнае відовішча таго, як шпіёнскі паветраны шар пралятае над Амерыкай, стала прыніжэннем для адміністрацыі Джо Байдэна. Але адміністрацыя можа заявіць, што яна чакала найлепшага моманту, каб знішчыць апарат і захапіць ягоны таемны груз. А гэты дзіўны выпадак будзе карысны выведцы ЗША. Пра гэта ў артыкуле для Washington Post піша амерыканскі пісьменнік і журналіст Дэвід Ігнатыус. Ён зазначае, што палітычныя сутыкненні вакол кітайскага паветранага шара ўжо пачаліся ў Вашынгтоне.

Рэспубліканцы сцвярджаюць, што адміністрацыя Байдэна прадэманстравала слабасць, дазволіўшы кітайскаму прыстасаванню зайсці ў паветраную прастору ЗША. Чыноўнікі ж у адказ указваюць на тое, што адміністрацыя Дональда Трампа ўвогуле ніяк не адрэагавала на некалькі падобных выпадкаў. Зрэшты, тады шары не лёталі так доўга ці гэтак далёка. Яны нават не дасягалі кантынентальнай часткі ЗША.

Ігнатыус прапануе разгледзець выведныя дэталі здарэння з паветраным шарам Кітая, агучаныя чыноўнікам ЗША, які мае веды пра здарэнне з першых вуснаў.

Частка пра таямніцы. Кітай запускае выведныя паветраныя шары ўжо шмат гадоў. У Пентагоне сказалі, што ў суботу ўвечар у свеце лётала пяць такіх кітайскіх апаратаў. А ў апошняе дзесяцігоддзе Пекін правёў 20–30 такіх запускаў па ўсім свеце. Паветраныя шары не збіраюць больш выведных звестак, чым кітайскія спадарожнікі на нізкай арбіце Зямлі. Аднак яны могуць вісець даўжэй над такімі мэтамі, як месца базавання МБР у Мантане, над якім кітайскі апарат праляцеў некалькі дзён таму. Аднак паветраныя шары не стацыянарныя. І іх здольнасць збіраць сігналы не моцна адрозніваецца ад магчымасцяў іншых сістэмаў, даступных Кітаю, – сказаў чыноўнік Пентагона.

Паветраны шар можа забяспечыць добрую дэталізацыю фотаздымкаў. Таксама не выключана, што яго задачай было справакаваць амерыканскі радар ці сігналы сістэмаў электрамагнітнай барацьбы, пра якія было б карысна ведаць у выпадку ўзнікнення канфлікту ў будучыні. Але збор такіх звестак мае абмежаваную каштоўнасць. Было і меркаванне, што паветраны шар нёс меншыя шпіёнскія прыстасаванні: мікрабеспілотнікі, якія могуць сачыць за амерыканскімі таямніцамі. Але чыноўнікі заявілі, што ніякіх доказаў такой версіі не было знойдзена.

Таксама таямнічая частка стане больш зразумелай, калі Пентагон зможа дастаць выведную прыладу, якую паветраны шар нёс. Відавочна, гэтая прылада ўпала ў Атлантычны акіян амаль цэлай. Яна можа даць карысную магчымасць вывучыць і прайграць кітайскія выведныя і камунікацыйныя сістэмы. А таму з гледзішча выведкі, чыноўнікі Пентагона мяркуюць, што дзіўны ваяж паветранага шара, які доўжыўся цэлы тыдзень, можа прынесці большую карысць ЗША, чым Кітаю.

Частка пра загадкі. У выведцы не ведаюць, чаму Кітай надумаў правесці місію менавіта цяпер, у той дзень, калі Дзяржсакратар Энтані Блінкен планаваў наведаць краіну. Візіт быў скасаваны праз палёт паветранага шара.

«Відавочная верагоднасць заключаецца ў тым, што гэта была кітайская спроба ўмацаваць сваю сілу і размах у момант, калі справы ў Пекіна ідуць не вельмі добра праз запаволенне эканамічнага росту, публічныя палітычныя пратэсты і няўдалае кіраванне пандэміяй каранавірусу. Магчымасць "ткнуць палкай у вочы" ЗША заўсёды была прывабнай для ваяўнічага рэжыму Сі Цзіньпіна", – мяркуе Ігнатыус.

Чаму цяпер? Выведныя аналітыкі разглядаюць магчымасць, што кітайскія вайскоўцы ці «ястрабы» ва ўладных колах наўмысна спрабавалі сабатаваць візіт Блінкена, галоўнай мэтай якога было даследаваць стратэгічныя стабілізацыйныя захады ды іншыя засцерагальнікі, якія абмяжоўваюць верагоднасць ненаўмыснай эскалацыі праз Тайвань ці іншыя пытанні. Таксама не выключана, што гэта была проста памылка, якія здараюцца ў выведных ці ваенных аперацыях.

«Часам левая рука не ведае, што робіць правая», – сказаў чыноўнік Пентагона.

Шпіёны ўмеюць збіраць таямніцы. Менавіта гэта рабіў Кітай з дапамогай паветранага шара. І менавіта гэта ЗША цяпер будуць рабіць, спрабуючы прааналізаваць абсталяванне, якое ён нёс. Але выведка не можа развязаць загадкі, самая вялікая з якіх сёння – гэта пытанне намераў і патэнцыйных наступстваў глабальных намаганняў Сі Цзіньпіна ўмацаваць кітайскую магутнасць.