Міжнародны суд у Гаазе выдаў ордэр на арышт Пуціна

Расейскага кіраўніка вінавацяць у ваенных злачынствах.

Міжнародны крымінальны суд у Гаазе выдаў міжнародныя ордэры на арышт прэзідэнта Расеі Пуціна, а таксама ўпаўнаважанай у правах дзіцяці Марыі Львовай-Бяловай, паведамляе ВВС.

- Сёння, 17 сакавіка 2023 года, Другая палата дасудовага разбору Міжнароднага крымінальнага суда выдала ордэры на арышт двух персон у кантэксце сітуацыі ва Украіне: Уладзіміра Уладзіміравіча Пуціна і Марыі Аляксееўны Львовай-Бяловай, - гаворыцца ў прэс-рэлізе МУС.

Міжнародны крымінальны суд тлумачыць, што Пуцін і Львова-Бялова падазраюцца ў незаконнай дэпартацыі ўкраінскіх дзяцей.

Вываз украінскіх дзяцей на тэрыторыю Расеі можа ўважацца за ваеннае злачынства, заявіла следчая камісія ААН.