На дзяржаўнай ТВ расказалі новыя дэталі аб шпіёнскім скандале з беларусамі ў Польшчы
1- 20.03.2023, 15:46
- 7,058
Аднаго з фігурантаў справы абвінавачваюць у працы на КДБ.
У адным з сюжэтаў дзяржаўнай ТВ расказалі новыя дэталі аб шпіёнскім скандале з беларусамі ў Польшчы. У эфіры прапагандысцкага тэлеканала паказалі дакумент з польскага суда. Гэты дакумент, які паказалі на БТ, паступіў у пасольства Беларусі ў Варшаве з раённага суда Люблін-Захад, звяртае ўвагу «Наша Нiва».
У дакуменце можна разгледзець тэкст абвінавачання Мікалая Маскаленкі.
Там сцвярджаецца, што ён з 2018 года ў горадзе Бяла-Падлясцы і іншых гарадах Люблінскага ваяводства браў удзел у вайскова-выведвальнай дзейнасці КДБ Беларусі супраць Польшчы. Маскаленка, згодна з дакументам, назіраў за аэрадромам у Бяла-Падлясцы і збіраў інфармацыю аб тым, што там адбываецца. А таксама збіраў інфармацыю пра аб'екты Агенцтва ўнутранай бяспекі.
Маскаленку ўзялі пад варту з 1 сакавіка да 28 траўня. Ён цяпер сядзіць у Любліне.
Пра двух іншых затрыманых расказвае вядоўца, самі дакументы разгледзець немагчыма.
Уладзіслава Пасміцюху арыштавалі на 3 месяцы, Марыю Мядзведзеву - на 1 месяц.
Уладзіслава, як кажа вядоўца, абвінавачваюць ва ўдзеле з 5 студзеня да 6 сакавіка ў арганізаванай злачыннай групе пад кіраўніцтвам неўстаноўленай асобы па імені Андрэй, якая павінна была збіраць інфармацыю аб аб'ектах крытычнай інфраструктуры.