У Маладзечне аўто пасля сутыкнення разарвала на часткі
3- 21.03.2023, 11:55
- 8,004
ДТЗ здарылася на вуліцы Вялікі Гасцінец сёння раніцай.
У Маладзечне сутыкнуліся тры аўто. Адное з іх разарвала на дзве часткі. Здарэнне адбылося на вуліцы Вялікі Гасцінец сёння раніцай. Паводле папярэдніх звестак, пашкоджанні атрымалі кіроўцы «Хонды» і «Фіята», паведамляе kraj.by.
ДТЗ здарылася прыкладна а 07:15 - 07:20 у ім удзельнічалі тры аўтамабілі - «Хонда», «Фіят» і «Жыгулі». Адзін з самаходаў, які фактычна разваліўся на часткі, давядзецца эвакуаваць пры дапамозе пад'ёмнага крана. Паводле папярэдніх звестак, кіроўца «Фіята» атрымаў пералом двух рэбраў і траўму грудной клеткі. Гэтыя траўмы характэрны для сітуацыі, калі кіроўца быў прышпілены рамянём бяспекі.
У кіроўцы «Хонды» падазраюць чэрапна-мазгавую траўму і пашкоджанне хрыбта. «Жыгулямі» кіраваў паджылы мужчына. Дзядуля цялесных пашкоджанняў, паводле папярэдніх звестак, не атрымаў, але знаходзіўся ў стане, падобным на шок. Яго аўто пацярпела найменей.