Зяленскі прыехаў на перадавыя пазіцыі ўкраінскага войска на Бахмуцкім кірунку
6- 22.03.2023, 14:27
- 9,184
Прэзідэнт Украіны ўручыў узнагароды героям.
Прэзідэнт Украіны Уладзімір Зяленскі падчас рабочай паездкі ў Данецкую вобласць наведаў перадавыя пазіцыі ўкраінскіх абаронцаў на Бахмуцкім кірунку.
Пра гэта паведамляе Офіс прэзідэнта Украіны.
Зяленскі заслухаў даклады аб аператыўнай сітуацыі і ходзе баявых дзеянняў на адцінку фронту.
Прэзідэнт таксама паразмаўляў з вайскоўцамі і падзякаваў ім за абарону Украіны.
«Маю гонар сёння быць тут, на ўсходзе нашай дзяржавы, на Данбасе, і ўзнагародзіць нашых герояў, падзякаваць вам, паціснуць руку. Падзякаваць за тое, што абараняеце дзяржаву, суверэнітэт, усход Украіны», - сказаў кіраўнік дзяржавы.
Прысутныя ўшанавалі хвілінай маўчання памяць загінулых абаронцаў.
Зяленскі таксама ўручыў вайскоўцам дзяржаўныя ўзнагароды.
Ордэн "Залатая Зорка" атрымаў артылерыст, капітан Ілля Вяргун, якому прысвоілі званне Героя Украіны. З 24 лютага 2022 года ён прымае ўдзел у супрацьстаянні ўзброенай агрэсіі РФ. Герой непасрэдна кіраваў супрацьтанкавымі разлікамі пры вызваленні Трасцянца Сумскай вобласці, удзельнічаў у стрымліванні ворага на Ізюмскім кірунку. Падраздзяленні пад яго кіраўніцтвам і пры непасрэдным удзеле Вяргуна знішчылі вялікую колькасць расейскай тэхнікі.