Беларускі футбол узначаліў заатэхнік

Раней АБФФ узначальваў артылерыст.

Былы старшыня Віцебскага аблвыканкама Мікалай Шарстнёў стаў старшынём Асацыяцыі «Беларуская федэрацыя футбола».

Ранейшы кіраўнік АБФФ Уладзімір Базанаў зняў сваю кандыдатуру. Выбары новага старшыні прайшлі на справаздачна-выбарнай канферэнцыі федэрацыі, якая адбылася сёння, паведамілі ў прэс-службе НАК.

Мікалай Шарстнёў з'яўляецца выпускніком Віцебскай ветакадэміі. Ён скончыў яе па спецыяльнасці «заатэхнія» ў 1983 годзе. Потым працаваў заатэхнікам, пакуль не ўзначаліў адно з сельгапрадпрыемстваў. Пазней кіраваў «Белптушкапрамам», птушкафабрыкай, быў памочнікам Лукашэнкі - інспектарам у Віцебскай вобласці. Выканкам рэгіёну ён узначальваў з 2014 года да снежня 2021 года. Мікалай Шарстнёў захапляецца цяжкай атлетыкай: цісне штангу і паднімае гіры. Ён нават выступаў на чэмпіянаце свету ў сферы масавага гіравога спорту.

Уладзімір Базанаў таксама не быў прафесійным спартоўцам. Ён вайсковец-артылерыст.