Сі Цзіньпін атрымаў жаданае: што Расея саступіла Кітаю

Узамен Крэмль застаўся з пустымі заявамі аб «сяброўстве».

Закончыўся візіт кіраўніка Кітая Сі Цзіньпіна ў Расею. У супольнай заяве гаворыцца, што «стасункі краін не з'яўляюцца ваенна-палітычнымі, не маюць канфрантацыйнага характару і не накіраваны супраць трэціх краін». Лідар КНР атрымаў усё, што хацеў, але не даў Уладзіміру Пуціну нічога, акрамя заяў аб сяброўстве.

Такое меркаванне ў эфіры «24 канала» выказаў паліттэхнолаг Барыс Тызенгаўзен. Паводле яго слоў, «мірны план» Кітая што да вайны ва Украіне стаў падставай для прыезду імператара да васала.

«Пуцін ужо даўно стаў эканамічным васалам Кітая, а пасля гэтай сустрэчы ён стаў і палітычным. Думаю, што неўзабаве можна будзе чакаць заяў аб арэндзе новых земляў Кітаем, напрыклад, на 49 гадоў. КНР арандуе землі не проста для сельскай гаспадаркі, а заходзіць у нетры, здабывае і максімальна выкарыстоўвае», - заўважыў ён.

Паліттэхнолаг зазначыў, што Пуцін нічога не можа зрабіць у адказ для Сі Цзіньпіна. На яго думку, Кітай не будзе рызыкаваць і дапамагаць Расеі зброяй, бо баіцца санкцый Захаду.

Барыс Тызенгаўзен адзначыў, што лідар КНР атрымаў усё, што хацеў, але не даў Уладзіміру Пуціну нічога, акрамя заяў аб сяброўстве. Паліттэхнолаг звярнуў увагу на тое, што Расея будзе пераходзіць на разлік у юанях з краінамі Азіі і Лацінскай Амерыкі.

«Гэта сведчыць аб тым, што Сі будзе купляць у Расеі больш энэргарэсурсаў і плаціць за іх юанямі. Гэта праблема для Пуціна, куды ён падзе гэтыя юані. Я ўяўляю, як Пуцін надумае разлічыцца з краінамі Афрыкі юанямі. Каму яны тамака патрэбныя?» - кажа ён.

Паліттэхнолаг падкрэсліў, што такія стасункі з Расеяй вельмі выгадныя для Кітая. Найперш Пекін вельмі нізкімі коштамі будзе купляць у Пуціна энэргарэсурсы, карысныя выкапні і гэтак далей.

«Таксама Кітай проста загаціць расейскі рынак сваімі таварамі. Пуцін нічога не зможа зрабіць, каб ад гэтага адмовіцца», - дадаў Тызенгаўзен.