Брытанская выведка назвала цэль расейскага войска ў Беларусі

Мінабароны Брытаніі паведаміла аб «важным палітычным сігнале».

Расея вымушана выкарыстоўваць тэрыторыю Беларусі і беларускіх інструктараў для навучання мабілізаваных.

Пра гэта паведамляе Міністэрства абароны Вялікабрытаніі ў Twitter.

Як адзначаецца ў справаздачы, у сярэдзіне сакавіка 2023 года Расея перадыслакавала не менш за 1 000 вайскоўцаў, якія праходзілі навучанне на палігоне Абуз-Лясноўскі на паўднёвым захадзе Беларусі.

Са звестак брытанскай выведкі, хоць новай ратацыі войскаў адзначана не было, Расея, пакінула намётавы лагер на месцы, пакідаючы магчымасць працягу праграмы навучання.

«Той факт, што Расея звярнулася да навучання свайго персаналу ў значна менш дасведчаным беларускім войску, падкрэслівае, наколькі расейская «спецыяльная вайсковая аперацыя» сур'ёзна парушыла сістэму падрыхтоўкі расейскіх узброеных сіл - інструктары ў асноўным былі размешчаныя ва Украіне», - адзначаюць у Мінабароны Брытаніі.

Акрамя таго, Расея, магчыма, таксама разглядае ўскосную падтрымку аперацыі Беларуссю як важны палітычны сігнал, мяркуюць у брытанскай выведцы.