Аксёнаў і Прыгожын стварылі новую ПВК у Крыме
6- 24.03.2023, 15:40
- 9,226
Стала вядома, хто курыруе баевікоў.
Так званы «кіраўнік» Крыма стварыў на акупаванай паўвыспе сваю прыватную ваенную кампанію. Камандуе ёю адзін з галоўных наймітаў ПВК «Вагнера».
Пра гэта паведамляюць «Важные истории».
СМІ адзначаюць, што Аксёнаў адзін з нешматлікіх сярод расейскай эліты падтрымлівае шчыльны кантакт з «кухарам Пуціна» і ўладальнікам «Вагнера» Яўгенам Прыгожыным. Відавочна, яны разам стварылі ў акупаваным Крыме асобную вайсковую групоўку.
У сакавіку гэтага года Аксёнаў у эфіры крымскай тэлевізіі распавёў аб з'яўленні ў Крыме новага «вайсковага падраздзялення». СМІ сцвярджаюць, што гаворка ідзе пра прыватную вайсковую кампанію «Канвой».
У Telegram нават з'явіўся канал з аднайменнай назвай. У ім публікуюцца заклікі ўступаць у ПВК, а таксама прапагандысцкія тэксты. Канспіратыўныя тэорыі аб тым, як Ракфелеры выкупілі сістэму водазабеспячэння ва Украіне і цяпер «з дапамогай спецыяльнага хімічнага складу паралізуюць тыя адцінкі мозгу, якія адказваюць за ідэнтыфікацыю чалавека».
Са звестак выдання, фармальна «Канвой» - гэта баявы вайсковы рэзерв (БАРС). Удзельнікі падпісваюць два кантракты - з ПВК і «Мінабароны». Са слоў аднаго з чальцоў, заробак наймітаў за месяц - блізу 200 тысяч рублёў, а камандавання - 300 тысяч. Акрамя гэтага абяцаюць зямлю «ў Крыме або Абхазіі».
Выданне зазначае, што ў складзе падраздзялення служыць блізу 300 чалавек. Пазіцыі «Канвою» знаходзяцца ў суседняй з Крымам Херсонскай вобласці.
Хто курыруе ПВК
«Гэта ПВК Аксёнава, але ўсё камандаванне - былыя супрацоўнікі ПВК Вагнер. Усе - даўно знаёмыя адзін аднаму людзі», - заявіў былы найміт «Канвою».
СМІ ўстанавіла, што курыруе працу ПВК правая рука Прыгожына Канстанцін Пікалаў з пазыўным «Мазай». Ён таксама з'яўляецца куратарам ПВК «Вагнера» ў Афрыцы.
Яшчэ адным кіраўніком «Канвою» з'яўляецца Васіль Яшчыкаў, які заяўляе, што яго продак быў «казаком і асабістым целаахоўнікам імператара Мікалая II і імператрыцы Марыі Фёдараўны».