«Часам людзі праязджаюць па 200 метраў за дзень»

Беларус расказаў аб сітуацыі на мяжы з Польшчай.

Пагранпераход «Баброўнікі - Бераставіца» ў Гарадзенскай вобласці закрылі яшчэ 10 лютага. У будні найбольш хуткім спосабам праходжання мяжы называлі выезд на аўтобусах: за 3,5 гадзіны можна было прайсці дзве граніцы. А як справы ідуць цяпер, праз паўтара месяца? ЧытачOnliner Канстанцін адправіўся ў Польшчу на рэйсавым аўтобусе «Мінсктранса» і расказвае, колькі гадзін прастаяў у чарзе на беларускай мяжы.

- А 19:00 мы выехалі ў бок ПП «Берасце - Тэрэспаль» з Менска з аўтавакзала «Цэнтральны», - распавядае Канстанцін. - А 00:45 прыбылі на мяжу, 35 аўтобусаў было перад намі. А 06:10 чарга зменшылася прыкладна на 5—7 аўтобусаў, рушылі наперад мы даслоўна на 150 метраў. За намі заставалася яшчэ блізу 12 аўтобусаў.

- Але шмат хто з пасажыраў пакінуў аўтобус а 00:45-07:00, - сцвярджае Канстанцін. - Гэта тыя, хто спяшаўся ў аэрапорт. Падыходзілі да аўтобусаў, якія стаялі на пачатку чаргі, і неяк дамаўляліся, каб іх падвезлі.

- А 10:00 (гэта значыць, праз 9 гадзін у чарзе) перад намі заставалася 8 аўтобусаў. За намі - больш за 15.

На тэрыторыю беларускага пункта пропуску, са слоў Канстанціна, рэйсавы аўтобус трапіў толькі а 12:00. Разам: крыху менш за 11 з паловай гадзін давялося правесці ў чарзе на ўезд у «Берасце». Да 13.40, як паведамляе мужчына, пасажыры аўтобуса прайшлі пашпартны кантроль.

А як справы ў дальнабойнікаў?

«Берасце - Тэрэспаль» прызначаны для легкавых аўто, а пункт пропуску «Казловічы» - гэта адзіны шанец пераадолець мяжу з Польшчай на грузавіку. Як справы з чэргамі ідуць там?

Свежае відэа, якое дэманструе маштабы калейкі, апублікаваў блогер Васька Пілот. З яго слоў, чарга расцягнулася на 30 км.

- Мой знаёмы цяперт знаходзіцца ў гэтай чарзе, – паведамляе наша чытачка Марына. - Па адлегласці яна сапраўды дасягае блізу 30 км і амаль не рухаецца. Часам людзі праязджаюць па 200 метраў за дзень. Некаторыя кіроўцы кажуць, што ніколі не былі ў чарзе, якая б так марудна рухалася. Наколькі мне вядома, ёсць тыя, хто без руху прастаяў 70 гадзін. Нейкае аўто бясплатна падвозіць ваду, але яго трэба загадзя заўважыць, каб спыніць.

Што гавораць у Пагранкамітэце?

З панядзелка чарга легкавых аўто на ўезд у краіны ЕЗ павялічылася ў 5 разоў, цяжкавікоў амаль у 2, паведамляе ДПК РБ. Згодна з іх графікамі, на 10:00 24 сакавіка перад беларускім пунктам пропуску «Казловічы» знаходзілася 500 грузавікоў. Найбольшая колькасць легкавушак на мяжы з краінамі ЕЗ фіксуецца перад пунктам пропуску «Тэрэспаль» (Берасце).