Жыхары «Менск-Міру» злавілі падазронага грамадзяніна

Ён прызнаўся, што краў медзь.

У розных дамах комплексу «Менск-Мір» з мінулага лета нехта ўпарта краў медныя правады з электрычных шчыткоў. Аднойчы падазраванага нават схапілі самі жыхары, здалі міліцыі. Сёння, здаецца, яго зноў злавілі, піша Onlíner.

Мінулым летам у «Менск-Міры» сталі знікаць зазямляльныя кабелі са шчытавых на лесвічных пляцоўках. Мяркуючы па допісах у мясцовым чаце, пацярпелі не менш за 11 дамоў.

Аднойчы адбылося кароткае замыканне, знікла святло. Пасля гэтага жыхары вылічылі «электрыка» па відэа.

І схапілі ў доме «Санкт-Пецярбург».

Тады, наколькі вядома жыхарам комплексу, грамадзяніну далі 3 месяцы арышту.

Працяг адбыўся цяперашняй зімой: ізноў сталі знікаць зазямляльныя правады. А сёння жыхары комплексу радасна паінфармавалі Onlíner: «электрык» злоўлены ў доме «Фламенка». Ізноў.

У Аляксандра кватэра ў гэтым доме, ён і заспеў падазраванага гэтым разам:

- З будматэрыяламі выходжу з ліфта - і бачу твар, які раней публікавалі ў нашым чаце. А ён на мяне глядзіць разгублена. Ну я кінуў свае дошкі, прыціснуў яго да сценкі - ды ён і не супраціўляўся асабліва...

Аляксандр тут жа запісаў відэа, на якім мужчына называе свае звесткі і збянтэжана прызнаецца: «Краў медзь». (Пазней высветлілася, што імя назваў чужое.)

У далейшым грамадзянінам займалася ўжо выкліканая на месца міліцыя.

Жыхары дома адзначаюць: з мінулай сустрэчы іх знаёмы «электрык» крыху здаў. І спадзяюцца, што на нейкі час правады перастануць знікаць.