Украіна патрабуе склікаць Раду бяспекі ААН праз заяву аб размяшчэнні ядзернай зброі ў Беларусі

Кіеў чакае эфектыўных дзеянняў з боку Вялікай Брытаніі, Кітая, ЗША і Францыі.

Украінскае МЗС выступіла з заявай наконт пастановы Расеі размясціць тактычную ядзерную зброю ў Беларусі. Украінская старана назвала яе "чарговым правакацыйным крокам", запатрабаваўшы склікаць Раду бяспекі ААН, і заклікала беларусаў не дапусціць яе рэалізацыі.

- Апошнія заявы РФ аб намерах размясціць на тэрыторыі Беларусі тактычную ядзерную зброю з'яўляюцца чарговым правакацыйным крокам злачыннага пуцінскага рэжыму, які падважвае падмуркі Пагаднення аб нераспаўсюджанні ядзернай зброі, архітэктуры ядзернага раззбраення і сістэме міжнароднай бяспекі ў цэлым, - заявіў украінскі МЗС. - Такія намеры не могуць не выклікаць асаблівай устурбаванасці для ўсёй сусветнай супольнасці, бо Расея заяўляе пра іх пры працягу сваёй нічым не справакаванай агрэсіўнай вайны супраць Украіны. Нягледзячы на жахлівыя злачынствы супраць чалавечнасці і ваенныя злачынствы, якімі Крэмль суправаджае гэтую захопніцкую вайну супраць суверэннай дзяржавы, Расея дэманструе сваю няздольнасць перамагаць на полі бою.

- Украіна звяртаецца да беларускага грамадства не дапусціць рэалізацыі злачынных намераў размяшчэння на тэрыторыі Беларусі ядзернай зброі насуперак яе абавязанням паводле Пагаднення аб нераспаўсюджанні ядзернай зброі, што яшчэ больш ператворыць гэтую краіну ў закладнікі Крамля і будзе мець катастрафічныя наступствы для яе будучыні, - гаворыцца ў заяве. - Звяртаемся да дзяржаў Групы Сямі і Еўрапейскага Уніі з просьбай папярэдзіць беларускія ўлады аб працяглых наступствах для Беларусі, у выпадку яе згоды прыняць на сваёй тэрыторыі тактычную ядзерную зброю ад Расеі.

МЗС заявіла, што Украіна чакае эфектыўных дзеянняў з боку Вялікай Брытаніі, Кітая, ЗША і Францыі, у тым ліку і "як сталых сябраў Рада Бяспекі ААН, якія нясуць асаблівую адказнасць за недапушчэнне пагроз агрэсіі з выкарыстаннем ядзернай зброі".

- Патрабуем неадкладна склікаць для гэтай мэты пазачарговае пасяджэнне Рады Бяспекі ААН, - заяўляе МЗС. - Украіна заклікае ўсіх чальцоў сусветнай супольнасці давесці да злачыннага пуцінскага рэжыму катэгарычную непрымальнасць яго чарговых ядзерных правакацый і цвёрдых захадаў з мэтай эфектыўнага стрымлівання і прадухілення ўсякай магчымасці ўжывання дзяржавай-агрэсарам ядзернай зброі. Расея чарговы раз пацвярджае сваю хранічную няздольнасць быць адказным распарадчыкам ядзернай зброі як сродкам стрымлівання і папярэджання вайны, а не інструментам пагроз і запалохвання. Свет мае быць аб'яднаны супраць таго, хто ставіць пад пагрозу будучыню чалавечай цывілізацыі.

Нагадаем, у суботу, 25 сакавіка, Уладзімір Пуцін заявіў, што дамовіўся з Аляксандрам Лукашэнкам аб размяшчэнні на тэрыторыі Беларусі тактычных ядзерных ракет.