Сырскі: Цяпер самая інтэнсіўная фаза баёў за Бахмут
3- 27.03.2023, 14:16
- 5,188
Вораг нясе значныя страты, але працягвае весці наступальныя дзеянні.
Камандзір Наземных войскаў УСУ генерал-палкоўнік Аляксандр Сырскі чарговым разам наведаў самыя гарачыя мясціны бахмуцкага кірунку, паведамляе Military Media Center.
«Працягваецца найбольш інтэнсіўная фаза баёў за Бахмут. Сітуацыя стабільна складаная. Вораг нясе значныя страты ў чалавечых рэсурсах, узбраенні і ваеннай тэхніцы, але працягвае весці наступальныя дзеянні. Нашы абаронцы ў звышцяжкіх умовах гераічна стрымліваюць варожае нашэсце і не пакідаюць ворагу шанцаў рэалізаваць свае задумы», - заявіў генерал-палкоўнік.
Паводле ягоных слоў, абарона Бахмута абумоўлена вайсковай неабходнасцю і грунтуецца на пісьменным выкарыстанні ахоўных магчымасцяў горада, збудаваных умацаванняў і абсталяваных агнявых збудаванняў.
Сырскі падкрэсліў, што камандаванне пралічвае ўсе магчымыя варыянты развіцця падзей, і будзе дзейнічаць адэкватна абстаноўцы.
Непасрэдна ў раёне выканання баявых задач украінскімі абаронцамі Сырскі ацаніў абстаноўку і прыняў шэраг мер для развязання праблемных пытанняў, якія перашкаджаюць эфектыўна выконваць баявыя задачы.
Таксама камандзір прыняў шэраг аператыўных пастаноў, накіраваных на ўзмацненне магчымасцяў у стрымліванні і нанясенні паразы захопнікам.