Дзяржаўны дэпартамент ЗША заявіў аб дырэктыўных сувязях беларускіх спартоўцаў з вайскоўцамі і спецыяльнымі службамі

МАК зацвердзіў санкцыі.

Дзяржаўны дэпартамент ЗША працягвае кансультацыі з Алімпійскім і Паралімпійскім камітэтамі ЗША, а таксама з краінамі-аднадумцамі ў сувязі з рэкамендацыямі Міжнароднага алімпійскага камітэта міжнародным федэрацыям што да патэнцыйнага ўдзелу расейскіх або беларускіх спартоўцаў у спаборніцтвах.

Як перадае «Радыё Свабода», пра гэта заявіў намеснік прэсавага сакратара амэрыканскага замежнапалітычнага міністэрства Вэдант Патэль.

- У нас па-ранейшаму выклікаюць сур'ёзную ўстурбаванасць дырэктыўныя сувязі паміж алімпійскімі і паралімпійскімі спартоўцамі ды расейскімі і беларускімі вайскоўцамі і нацыянальнымі спецыяльнымі службамі, а таксама праваўжывальныя механізмы МАК, якія не былі згаданыя ў апублікаваных сёння навінах, - заявіў вяшчальнік Дзяржаўнага дэпартамента.

Выканаўчы камітэт Міжнароднага алімпійскага камітэта 28 сакавіка абмеркаваў магчымасць дапускання расейскіх і беларускіх спартоўцаў да спаборніцтваў. У выніку пасяджэння МАК дапусціў удзел беларусаў і расейцаў у спаборніцтвах у нэйтральным статусе, але заявіў, што санкцыі, уведзеныя ў лютым 2022 года супраць беларускіх і расейскіх улад за вайну ва Украіне, маюць заставацца ў дзеянні.

На пасяджэнні выканаўчы камітэт МАК зацвердзіў рэкамендацыі для міжнародных спартовых федэрацый і арганізатараў міжнародных спаборніцтваў:

- спартоўцы з беларускімі і расейскімі пашпартамі могуць удзельнічаць у міжнародных спаборніцтвах толькі ў нэйтральным статусе,

- каманды спартоўцаў з беларускімі і расейскімі пашпартамі не дапускаюцца да ўдзелу ў спаборніцтвах,

- спартоўцы, якія актыўна падтрымліваюць вайну, не могуць браць удзел у спаборніцтвах (гэта ж датычыцца спартовага персаналу),

- спартоўцы, якія маюць кантракты з расейскімі або беларускімі вайсковымі ўстановамі або спецыяльнымі службамі не дапускаюцца да спаборніцтваў (гэта ж датычыцца спартовага персаналу),

- спартоўцы ў нэйтральным статусе маюць падпарадкоўвацца антыдопінгавым правілам,

санкцыі, уведзеныя супраць расейскіх і беларускіх уладаў пасля пачатку вайны, застаюцца ў дзеянні.

Санкцыі МАК прадугледжваюць забарону на правядзенне міжнародных спартовых акцый Расеі і Беларусі, забарону на выкарыстанне сцягоў і гербаў на міжнародных спартыўных спаборніцтвах і недапусканне афіцыйных асоб з Расеі і Беларусі на іх.

- МАК пакідае за сабой права прымаць пастановы аб іх удзеле ў належны час, нават калі яны будуць лічыцца кваліфікаванымі ў адпаведнасці з кваліфікацыйнымі крытэрамі, устаноўленымі адпаведнымі міжнароднымі федэрацыямі, - падкрэсліваецца ў прэсавым рэлізе.