The Washington Post: Пуцін набыў у Ізраілі кватэру для былой настаўніцы

І зрабіў гэта праз афшор алігарха Абрамовіча.

Амерыканская газета The Washington Post і Міжнародны кансорцыум журналістаў-расследавальнікаў знайшлі дакументы, якія даводзяць фінансавыя сувязі расейскага алігарха Рамана Абрамовіча і прэзідэнта Расеі Уладзіміра Пуціна.

Як піша The WP, гаворка ідзе аб дароўнай дамове сярэдзіны 2000-х гадоў, паводле якой кантраляваная Абрамовічам кампанія на Кіпры перавяла былой настаўніцы Пуціна грамадзянцы Ізраілю Міне Юдзіцкай-Берлінер 245 тысяч даляраў. У той жа дзень яна стала ўладальніцай невялікай кватэры ў цэнтры Тэль-Авіва. Юдзіцкая-Берлінер рэпатрыявалася ў Ізраіль у 1970-х гадах. У 2005 годзе Пуцін сустрэўся з ёю падчас візіту ў Ізраіль. СМІ паведамлялі, што Пуцін дапамог у тым, каб яна атрымала невялікую кватэру, але пра якую менавіта дапамогу ішла гаворка, не паведамлялася. Паводле інфармацыі The WP, грошы на куплю кватэры паступілі не ад Пуціна, а з афшорнага рахунку, кантраляванага Абрамовічам.

Як адзначаюць журналісты, сама транзакцыя нічым не характэрная, яна была зробленая амаль 18 гадоў таму і магла быць незаўважанай у шматмільярдных афшорных бухгалтарскіх справаздачах расейскіх алігархаў. Але гэтая купля, як піша выданне, мае вялікае значэнне, бо ў цэнтры ўгоды, якая мае асабістае значэнне для Пуціна, знаходзіцца Абрамовіч.

Раней Абрамовіч цягам дзесяцігоддзяў аспрэчваў усякую фінансавую сувязь, патрабуючы зняпраўджванняў ад СМІ і нават ініцыюючы судовы працэс, каб артыкулы, у якіх гаварылася аб тым, што ён выконваў распараджэнні Пуціна, былі выдаленыя. Як пісалі СМІ, алігарх спрабуе аспрэчыць пастанову ЕЗ і Вялікай Брытаніі аб выкарыстанні да яго санкцый.