На ядзерным палігоне КНДР зафіксаваная высокая актыўнасць
4- 2.04.2023, 18:46
- 10,018
Аналітыкі вывучылі спадарожнікавыя здымкі.
На палігоне ў Ёнбене, галоўным ядзерным комплексе Паўночнай Карэі, зафіксаваны высокі ўзровень актыўнасці, паведамляе «Радыё Свабода» са спасылкай на расследавальнікаў.
Аналітыкі вывучылі сакавіцкія спадарожнікавыя здымкі і прыйшлі да высновы, што на аб'екце заканчваюцца выпрабаванні легкаводнага рэактара. На палігоне будуецца новы дапаможны будынак. Паводле спадарожнікавых здымкаў за 3 і 17 сакавіка, там таксама былі зробленыя выкіды вады з сістэмы ахаладжэння рэактара. Гэта сведчыць аб яго хуткім пераходзе ў працоўны стан, пішуць расследавальнікі.
У нядзелю, 2 красавіка, Цэнтральнае тэлеграфнае агенцтва Карэі распаўсюдзіла паведамленне, у якім Пхеньян нагадаў, што валодае ядзернай зброяй. «ЗША і іх сатэлітам трэба памятаць, што дзяржава, з якой яны маюць справу, валодае рэальнымі ядзернымі ўдарнымі магчымасцямі», – гаворыцца ў заяве, якую прыводзіць паўднёвакарэйскае агенцтва «Рэнхап».
Каментары апублікаваныя на фоне нядаўніх вайсковых вучэнняў ЗША і Паўднёвай Карэі, а таксама заявы аб правядзенні імі новых. Найбуйнейшыя ў гісторыі дзвюх краін манеўры пройдуць у чэрвені - на фоне святкавання 70-годдзя амерыкана-паўднёвакарэйскага альянсу.
У час мінулых вучэнняў Пхеньян актывізаваў работу ў запусках ракет, у тым ліку імітаваў ядзерныя выбухі.