У Расеі ўзляцелі кошты трунаў

Падаражэлі і рытуальныя паслугі.

Вайна ва Украіне і санкцыі за яе справакавалі рост коштаў трунаў і рытуальных паслуг у Расеі, піша The Moscow Times.

Паводле Расстата, са студзеня 2022 года выраб труны падаражэў на 52%, да 6729,69 расейскіх руб, капанне магілы – на 13%, да 8765 расейскіх руб, а крэмацыя – на 36%, да 28,7 тыс расейскіх руб.

Падаражанне крыжоў, агародак і трунаў звязанае з ростам коштаў сыравіны - металу і дрэва, патлумачыла «Российской газете» гендырэктарка «Пахавальнага дома №1» Алена Эльсаліева. З яе слоў, дошка і метал падняліся ў кошце ў 2-2,5 разы, у тым ліку праз тое, што раней частка матэрыялаў закуплялася ва Украіне.

Аднак апошнім часам сыравіна таннее, зазначае віцэ-прэзідэнт Саюза пахавальных арганізацый і крэматорыяў (СПАК) Уладзімір Родзькін. Нягледзячы на гэта, канчатковы выраб можа і не патаннець, бо ёсць і іншыя фактары - лагістыка і рост заробкаў, дадае ён. Напрыклад, вялікі аб'ём камплектуючых і матэрыялаў ідзе з Кітая, дастаўка з якога моцна падаражэла.

З пачатку пандэміі кошт пахавання вырас прыкладна на 30% - да 120 расейскіх тысяч за пахаванне на могілках і да 50 тысяч за крэмацыю, кажа Родзькін, удакладняючы, што ўсё залежыць ад рэгіёна і пажаданняў сваякоў. Кошты трунаў вар'ююцца ад 4 тысяч да бясконцасці, а на Крайняй Поўначы значна даражэйшае капанне магіл, адзначыў прадстаўнік СПАК.

З яго слоў, на фоне росту коштаў расейцы пачалі эканоміць на пахаванні блізкіх. Так, да прыкладу, большасць аддае перавагу ставіць драўляны крыж замест каменнага помніка, які каштуе без усталявання ад 30 да 100 тысяч расейскіх руб. У выніку аб'ём расейскага рынку рытуальных паслуг за 2022 год вырас усяго на 5%, што ніжэй за інфляцыю, падкрэслівае Эльсаліева. Пры гэтым мінімальны пахавальны бюджэт у Маскве і Падмаскоўі складае блізу 100 тысяч расейскіх руб.

У той жа час вырас попыт на крэмацыю – у Маскве і Санкт-Пецярбургу яна займае да 70-72% ад агульнай колькасці пахаванняў, казаў кіраўнік ГК Ritual.ru Алег Шэлягаў. З яго слоў, паколькі крэмацыя ў Маскве каштуе прыблізна 130-150 тысяч расейскіх руб, з'явілася паслуга фальшкрэмацыя.

Вы прыходзьце ў развітальную залу, развітваецеся са сваяком, і далей труна з целам апускаецца ўмоўна ўніз на ліфце або сыходзіць у сцяну, цела вязецца на крэмацыю ў іншы горад, а праз нейкі час вам проста выдаюць урну з прахам і адпаведныя дакументы, - тлумачыў Шэлягаў.