Тры прычыны, чаму беларускія заўзятары пагарджаюць Сабаленкай

Тэнісістка не хавае сваіх сувязяў з рэжымам Лукашэнкі.

На днях Арына Сабаленка ўпусціла шанец стаць першай ракеткай свету, саступіўшы ў паўфінале Уімблдона. Пачытаўшы каментарыі беларускіх заўзятараў у сеціве, лёгка можна даведацца, што засмучэннем для іх гэта не стала.

У мінулым нават прапагандыст Рыгор Азаронак звяртаў увагу на негатыўную рэакцыю ў Беларусі на дасягненні Арыны Сабаленкі.

«Сабаленка выйшла ў фінал аўстралійскага чэмпіянату. Яны пачынаюць капацца ў біяграфіі. Публікуюць пра яе навіны, там можна ўсякія рэакцыі ставіць. Яны ставяць толькі дызлайкі. Ты бачыў рэакцыі: 1 [пазітыўная] і 3000 [негатыўных]. Зычаць ёй паразы» – абураўся Азаронак.

UDF называе прычыны, чаму беларускія заўзятары так негатыўна ставяцца да найлепшай беларускай тэнісісткі.

Лукашэнка выкарыстоўваў Сабаленку для свайго піяру

У 2018 годзе ў Палацы Незалежнасці адбылася вельмі дзіўная сустрэча: Сабаленка, якая ўжо стала вядомай у свеце тэнісісткай, прыехала пагутарыць з Аляксандрам Лукашэнкам сам-насам. Прэс-служба кіраўніка Беларусі падкрэсліла, што сустрэча адбылася на просьбу Сабаленкі, але вельмі невыразна выказалася пра неабходнасць зносінаў.

Толькі нядаўна падаплёку патлумачылі на YouTube-канале «Чеснок». Высвятляецца, у юнацтве Сабаленка падпісала нявыгадны кантракт з расейскім спартовым агентам. Каб абысці юрыдычныя нормы, яна звярнулася да Лукашэнкі, чые падначаленыя патлумачылі агенту, якія негатыўныя наступствы яго могуць чакаць, калі ён не адпусціць беларускую тэнісістку.

У 2020-м Сабаленка заплюшчыла вочы на гвалт у Беларусі і выбрала бок Лукашэнкі

Хоць першапачаткова падавалася, што тэнісістка, як і іншыя вядомыя беларускія спартоўцы (напрыклад, баскетбалістка Алена Леўчанка і плыўчыха Аляксандра Герасіменя), зробіць відавочны маральны выбар.

13 жніўня Сабаленка напісала ў сацсетках:

«Я не магу паверыць, што ўсё гэта адбываецца ў маёй мірнай роднай Беларусі. Я не магу спаць ужо чацвёртую ноч, не магу глядзець на жорсткасць у дачыненні да безабаронных людзей. Навошта? Калі ласка, спыніце гвалт!!! Беражыце сябе і сваіх блізкіх, мае дарагія беларусы».

Аднак Сабаленка наўпрост не назвала бок, вінаваты ў гвалце над мірнымі грамадзянамі. А далей і зусім замоўкла пра страшныя падзеі ў Беларусі. У адказ на папрокі карыстальнікаў тэнісістка стала агрэсіўна адказваць у каментарах і заявіла пра сваё цкаванне.

А ў канцы 2020 года Сабаленка і зусім падпісала праўладны ліст беларускіх спартоўцаў, у якім гаварылася, што іх «абавязак не выступаць з палітычнымі заклікамі, а перамагаць на спартовых арэнах». З'явіўся гэты ліст у піку звароту атлетаў, якія не пабаяліся выступіць супраць гвалту ў краіне.

Яшчэ праз месяц Сабаленка сваімі дзеяннямі канчаткова падкрэсліла, што выбрала бок дыктатара: тэнісістка з'явілася на навагоднім прыёме ў Лукашэнкі, які расправіўся з народнымі пратэстамі супраць ягонай узурпацыі ўлады.

Пасля нападу на Украіну Сабаленка адмаўлялася асуджаць агрэсараў

На момант нападу расейскіх войскаў на Украіну ў лютым 2022 года (у тым ліку са згоды Лукашэнкі з тэрыторыі Беларусі) Сабаленка была адной з першых тэнісістак планеты. З улікам таго, што яна жыве ў ЗША, здавалася, што для Сабаленкі не стане праблемай асудзіць агрэсараў і суагрэсараў.

Але не. Беларуская тэнісістка, нягледзячы на штодзённую гібель людзей ва Украіне, рабіла выгляд, што не хоча «лезці ў палітыку». Толькі ў студзені 2023 года яна заявіла, што «ніхто не падтрымлівае вайну». Дадаўшы да гэтага словы, якія выклікаюць сумневы ў агучанай пазіцыі:

«Чаму мы мусім крычаць пра гэта на кожным кроку? Гэта зусім не дапаможа».

Нарэшце, толькі ў чэрвені гэтага года Сабаленка, адказваючы на папрокі журналістаў, заявіла:

«Я не падтрымліваю вайну, а гэта значыць, што я не падтрымліваю Лукашэнку ў гэты момант».

І зноў узнікла адчуванне, што тэнісістка сказала гэта не шчыра, а пад ціскам. Агаворка пра непадтрымку Лукашэнкі «ў гэты момант», намякае на іншае.

Якраз пасля гэтай заявы на Netflix выйшаў серыял, у якім беларуская тэнісістка са слязамі на вачах расказала, з якім хэйтам сутыкнулася за тое, што не асудзіла вайну ва Украіне.

Аднак разжаліць беларускіх заўзятараў Сабаленка не змагла. Футбольны трэнер Аляксандр Хацкевіч нядаўна выказаў думку, якую, напэўна, падзяляюць многіх з іх.

«Цяпер менш мяне там радуюць гэтыя перамогі (Сабаленка і Азаранка), таму што ўсё ж дзяўчаткі незалежныя, дзяўчаткі багатыя, але без пазіцый. Трэба дакладна сказаць, што "я супраць вайны". А не так: "Я супраць любой вайны". Супраць якой любой вайны? Цяпер адна вайна ідзе ў Еўропе, за 500 кіламетраў ад твайго дому. І ты кажаш, я супраць любой вайны. Жывуць у Амерыцы, трэніруюцца ў Амерыцы. Я не разумею гэтага, што агульнымі фразамі ўсё гэта абыходзіцца», – адзначыў Хацкевіч.